文大小姐: 練習畫畫

一直以嚟, 我都希望自己盡量唔強迫阿囝學一啲佢無興趣既野~ 游水除外~ 因為我覺得係求生能力, 而且男仔都真係要識游水! 其餘樂器、畫畫、其他運動佢都唔太鐘意, 所以無謂花時間迫佢做啲佢唔喜歡的事~ 揀啲佢鐘意的, 先有機會發揮所長嘛~

寶品自細就唔喜歡填色/畫畫, 做功課要填色的佢都係hea油, 又完全無意慾自己拎支筆嚟寫寫畫畫..... 而我一直都覺得無所謂, 畫畫唔叻都無乜問題吖? 字遲早都識寫ga la? 畫遲早都識畫ga la?直到上咗一連串的面試班....現實話比我哋知, 去考小學係經常都會要求小朋友畫畫! 每次阿仔的作品都同其他同學有強烈的對比! 佢真係明顯地被比下去.....畫得少野不突止, 仲欠缺創意, 有時仲畫到離哂題......就算老師鼓勵佢再畫多d, 佢都好似諗唔到點畫咁.....我諗一來佢無乜興趣, 二來平時真係太少畫畫, 所以唔識畫, 亦唔明白老師既要求~

如果到時面試真係衰在幅畫上, 真心覺得有啲唔抵! 所以唯有依加開始惡補la~ 不過我覺得就算依加報畫班, 都未必在短時間內睇到成果..... 而且畫班都有好多種, 有啲叫小朋友跟住畫, 有啲就俾小朋友自己發揮多d~ 跟住畫 = 俾個框框小朋友, 我擔心影響佢既創意思維, 所以多啲俾小朋友自己去諗去畫的畫班會好d~ (純粹個人意見) 暫時未有啱心水又啱時間上的班, 而且阿囝的時間表都已經好密, 學多樣野又會加重佢既負擔~ 所以我哋決定自己教佢畫就算喇~

依加開始盡量每星期要佢畫2-3次, 每次比1個topic佢叫佢任意畫, 遇到唔識畫的, 就問媽咪~ 雖然佢都唔係太積極, 又唔算好樂意畫....不過無辦法la! 面試要緊呀囝! 唔係要求佢畫得有幾靚, 只係想佢每次畫的畫都合乎纙輯, 貼題, 同埋豐富少少啫~ 希望會有進步啦~

我比個題目佢, 係交通工具~ 見佢話唔識畫, 俾埋本書佢做參考~ 最後佢畫咗一架巴士....有冇人睇得出係巴士呢? haha

我話佢畫得太少, 叫佢畫多d野, 佢就係咁易, 加咗盞交通燈.... 真係幾求其吓, 你話我點會唔擔心吖? 啲對手咁鬼強勁, 個個畫得有文有路又豐富>.<!