GAPSK - 中級

上年8月完成咗GAPSK 初級, 今年1月初就考中級試了~ 本來學習普通話的補習社想寶品再遲多2個月先考試, 驚佢未ready, 不過個人認為學習5個月, 都足夠應付中級試, 不想拖慢進度, 所以堅持要求1月考試, 最後寶品取得"卓越" 級別~ 唔駛補考, 真係鬆一口氣呀!

真心講, 花咗咁多錢同時間去上堂, 我當然會希望大家所付出的會見到成果~ 小朋友學到野有進步之餘, 仲希望有張靚cert去證明佢既能力~ 當然我哋係絶對無俾壓力小朋友, 唔敢多提, 只係叫佢要盡力答, 同埋一定要有禮貌~ 如果拎唔到A, 就下次再試過la~

經歷過幾次不同的考試, 寶品已經知道考A係最叻~ 感受到拎A係會得到老師同埋屋企人既讚賞, 所以佢都好期望自己拎到A ga~ 

講吓個普通話考試, 初級時我比較緊張, 都有間中幫佢練習~ 但去到中級, 因為我太忙的關係, 我交哂比老師.....直到考前2星期, 老師話佢放完聖誕假後好多野甩哂, 唔記得.....所以我就臨急抱佛腳, 即刻拎本書出嚟陪佢讀吓~

唔睇唔知, 原來朗讀句子果part, 一共有47句, exam會抽其中5句叫小朋友朗讀.....我覺得真係唔可以話好簡單....即係考埋普通話認字! 然而又發覺仔未完全掌握哂, 就開始有啲擔心喇! 其餘對答部份的範圍都不少, 至於聆聽部份我覺得係最容易~

臨急抱佛腳, 去觀瀾湖玩都玩得唔放心, 帶埋本書去, 在車上陪囝溫習~ 不過成個trip都只係溫咗一次.... 去玩實在太攰, 囝長期無乜電, 跟本都溫唔到書~

考試當日要一早去到何文田~ 寶品未去過何文田, 其實佢幾enjoy去其他地區考試, 只係父母唔enjoy~ ^^"

考完試, 都仲係早餐時段, 就陪囝去附近歎個早餐~ 今次順利過渡, 期望下次高級試都會取得好成績~ 真係要加油! 因為難度一定會加深, 真係要好好準備, 無得靠運氣~ 

問寶品鐘唔鐘意學普通話, 佢話: 唔鐘意~

但無奈現實係身於香港, 唔理你鐘唔鐘意, 學生都要學普通話~ 依加唔學, 遲吓都要學....

真心佩服阿囝, 無論我安排乜野比佢學, 佢鐘唔鐘意, 都會照學無扭計! 我估計佢唔算鐘意學野, 但又未至於抗拒~ 又或者, 佢已經習慣咗, 學野係佢生活的一部份~

有時都覺得, 要阿囝做繁忙兒童, 咁細個就要面對考試, 真係幾慘! 已經唔算係咩十八般武藝, 只係主力學中英數, 都排到啲時間表爆滿.....為既就係一個心儀學位! 我覺得好黐線, 但又唔敢乜都唔做唔去準備~ 入錯小學影響太深遠, 真係玩唔起! 唯有同自己講, no pain no gain~ 期望捱多一年就海闊天空!

其實阿囝好易tum, 有雪糕食已經好開心~ 

雖然每逢星期六都要連踩幾堂, 不過就造就咗我哋每逢星期六都陪佢飲茶食lunch (面試班隔離就係酒樓)~ 寶品最鐘意去飲茶食流沙包~ 加上去學野要搭西鐵港鐵, 囝都好樂意搭車去上堂~