又淘書!

唔好以為我好怪獸, 成日買書谷個仔睇書~ 今次淘的大多係玩樂性質的貼紙書和填色書~

上排左邊3本迪迪尼colouring book品質很好, 似係正貨~

燈~燈~~ 加埋3千個貼紙! 有排玩有排貼喇~^^

其實我都有擔心過, 寶品他日會唔會通屋亂咁貼貼紙.....不過事實上, 好多小朋友都好鐘意貼紙的~ 包括我自己細個時, 都非常愛貼紙~ 我認為一個快樂的童年, 係應該有貼紙享受貼貼的樂趣~ 唔想因為怕佢四圍貼難清理而剝削佢玩貼紙的機會~ 最多試吓俾d 心機教導佢, 貼在適當的地方囉~ 如果唔聽教的話, 就規定要我陪同先俾貼紙佢玩囉~^^"

依加d兒童圖書真係越出越多花款! 連3D書都有!! 要戴埋3D眼鏡嚟睇~ 感覺好有趣呀! 雖然唔知寶品對太空有冇興趣, 不過見唔算貴, 就買一本試吓la~

睇牙醫書~ 裡面有貼紙~ 有遊戲~ 同埋講解去睇牙醫既故事~ 題材有益又啱小朋友睇~

專心睇電視的小朋友!!

寶品真係好鐘意睇電視, 每次開電視佢都會目不轉睛咁望到實, 可能因為聲畫太吸引了~

因為睇過好多報導都話兒童多看電視會影響學習的專注力, 雖然未必係真, 不過我覺得成人劇集都對小朋友無乜益, 而且我相信睇電視係會沉迷同埋會變成一種習慣~ 為怕他人佢只愛有聲有畫的電視而把教材圖書打入冷宮.....我哋都係決定唔俾佢睇咁多~ 所以寶品平日係無得睇電視ga~ 我哋都有犧牲, 陪佢一齊唔睇~

不過有時去娘家, 或者有朋友嚟, 我哋都會照開電視, 唔想悶親D朋友~ 又或者有時有D節目我好想睇, 都會偷雞睇吓~ 所以寶品又未至於係零電視吓成長, 只係大部份時間唔睇, 唔想佢變成習慣啫~

有時真係好唔得閒理佢, 我就會播教材DVD俾佢睇, 佢好鐘意ga~ 睇到眼都唔眨! 不過我都盡量唔俾佢睇太長時間, 不然實好快近視~     

7...8...9個月喇!!

一直以嚟都無乜詳細記錄寶品的成長進度~ 主要都係因為我懶同埋無乜時間~ 今次又一次過放哂第7、8 and 9個月的蛋糕相~ 諗住切到1歲之後可能唔再每月1 cake喇~ 一來我哋次次都食唔哂, 二來切得太多可能寶品會覺得食生日蛋糕係平常事, 就無咁興奮ga喇~ 還是每年一次會令佢更期待and珍惜~

7個月~

8個月~

9個月~ 

真係越嚟越大個仔~ 長高拉長咗, 感覺無以前咁好肉哋了~ 不過由初生到現在佢都中碼bb, 唔算好肥又未至於瘦削~ 

8個半月時終於識爬~ 不過都係成日懶得爬, 要搵野引佢先有動力爬多幾吓~ 照推斷佢應該都會係遲識行的bb~

大肌肉發展唔算超卓, 不過小肌肉佢又ok ga wor! 食星星餅超快, 好細個已經識自己拎完放入口, 仲好少失手!

有一晚我在床上玩電話無留意到佢, 俾佢抆咗咁多紙巾出嚟!!@@" 快到吖! 忍唔住鬧咗佢一句: 你個衰仔!! (好阿媽的口吻~ haha)

Oxford path的英語教材我哋由寶品3個月開始用~ 用咗半年了~ oxford邀約我哋做1對1評估, 跟進bb的發展同埋學習進度~

寶品頭半個鐘都好乖乖的聽住導師講野, 又識比反應, 非常合作~ 之後就開始無耐性, 扭扭拎拎搵野玩~ 導師話佢都算幾好ga喇~

寶品勁鐘意去街街, 每次出街都好開心興奮~ 可能平日長困家中真係太悶了~ 當日我咩住佢搭西鐵, 來回都有人讓座比我哋~ 其實HK都仲有好多有功德心和愛心的人~

唔知係咪因為啱手形, 佢勁鐘意喳住條扶手, 捉實唔放~

近來寶品突然認人, 變得很黐身, 尤其黐我同埋我阿媽! 竟然愛我多過日對夜對的工人姐姐~ 黐身仔唔多肯俾其他人抱, 容易喊, 成日都扭我抱, 好彩都仲肯比鄧生抱, 不然真係黐住周身唔得閒~ 

正當我成日口不對心, 把口話佢煩, 其實心裡面好冧^^"......沉晚就發生咗"寶品嬲媽咪事件"!

話說沉晚寶品在玩裝奶粉的膠樽, 食得津津有味(佢乜都放入口咬ga), 我準備沖奶俾佢食, 所以就一手搶咗佢個樽, 佢立即超傷心咁爆喊! 因為佢喊係平常事, 所以我無理佢, 繼續開奶, 以為佢見到支奶就會無事~ 點知佢竟然連最愛的奶奶都唔要唔食@@"! 繼續聲嘶力竭咁喊, 仲好嬲咁推開我支奶, 我張開手話抱佢(平日佢最鐘意我抱的), 佢都推開我隻手唔要我......

於是我帶佢去佢平日最鐘意的地方-廁所~ 又帶佢去客廳玩, 諗住平伏佢心情, 可惜都係仍然聲淚俱下咁款.....睇得出佢真係好嬲我, 佢不斷掙扎唔要我抱, 真係勁傷我心! T.T.......

最後我唯有搵工人姐姐啦..... 佢過返姐姐手又無野喎, 仲肯食奶tim! 你個衰仔.....T.T.....

之後姐姐叫我去沖涼先, 佢湊住BB, 好彩沖完涼後, 寶品再次見返我又伸手要我抱~ 睇嚟佢已經忘記咗頭先件事!

事件令我覺得, 原來阿囝唔要我, 我係咁傷心! 既然佢始終都會長大,有毛有翼有自己世界, 不如我好好enjoy佢依加黐住我既moment la~~

"皮婚" @ Full House

又嚟到11月13日, 結婚咁就3週年喇!~ 今年同過往幾年最大的不同, 就係天陰有毛毛雨, 之前幾年都放晴大好天ga!

今年雖然我都有照請假, 不過鄧生有工事忙, 我哋無特別去邊度玩, 淨係食咗餐晚飯慶祝吓~

我唔太想食buffet, 因為每次都吃得很少....又唔想花太多錢去酒店食貴價晚餐~ 最後簡簡單單揀咗"Full House"食晩飯~

之前聽講果呢間餐廳的佈置係以wedding做主題, 所以就決定結婚紀念日嚟試吓!

位置在K-11對面~ 門口有架粉紅mini copper, 非常搶眼易認~

架車其實係甜品櫃來的~

門口有1家4口公仔~

一落樓梯, 就見到有大梳化同大公仔~ 好多人在此留影~

間餐廳開咗唔夠1年, 睇落都幾新淨, 坐位好鬆動~ 裡面聽講有結婚租衫同埋book影相等服務, 不過又唔覺有sales sell野喎~

新娘公仔~ 我都有同佢影合照~^^ 唔知點解,自從生完仔後, 覺得結婚好似已經係好耐之前既事咁....

充滿卡通的menu~

睇落佢似一間西餐聽, 其實佢係有得食星馬野的! 有喇沙...炒貴刁....海南雞等等.....感覺上好似同個場唔係好match! @@

哩度係無set叫, 全部分開點菜~ 而且價錢唔算經濟~

頭盤‧蟹餅~

頭盤‧大菇菇~

飲品都係單點~ 我係唔飲酒的, 所以又係點埋哂d 甜野~

主菜點咗牛柳同埋雞~ 2樣都唔錯~

我問佢有咩特色甜品, 佢話係心太軟......其實我覺得心太軟都幾無新意, 不過佢話好就即管試試la~ 最後出到嚟個賣相唔算靚, 不過唔太甜, 味道都唔錯~

例牌週年禮物 - 黃金戎子一隻~

每年鄧生都會到紀念日先買戎子, 因為想單據上的日子是11.13, 特別有意思~

同時亦見到幾年來的金價一路係咁....跌!

3年嚟同樣都係去六福買, 其實我好想揀花花款, 不過行咗幾間都無啱心水, 一係就同之前買的款式太相似...最後揀咗哩隻新款~

食飽飽我哋就去海港城取蛋糕!

今年我都係幫襯ms B~

海港城新店地方都幾大, 有好多張枱可以坐低歎cake~

今年我揀咗哩款靚靚蛋糕!!

拎返屋企同阿囝一齊切~

個蛋糕外型100分, 不過味道就甜咗d~ 除咗裡面有好多色彩縯紛的熊仔糖外, 連d cream都係用綿花糖打成的~ 成個蛋糕都充滿咗香香的糖果味!

不過太甜的蛋糕, 始終唔係我杯茶.....啱小朋友多d! 而且個蛋糕500g都要七百幾蚊, 好似唔係太值.....還是彩虹蛋糕最得我歡心!!

其實紀念日有禮物、有蛋糕、有鄧生、有阿囝我已經好滿足~ 當然如果阿囝可以一齊去食飯我會更開心la!~ 因為寶品現在很黐身又容易扭計, 所以鄧生成日都唔願意帶佢出去食飯, 話等佢大d先~ 但佢始終係我哋屋企既一份子嘛>.<, 雖然辛苦d, 我都會好想阿囝一齊參與, 一齊去街, 俾佢見多d 世面~~

現在每天上班前跟寶品say good-bye, 佢都會好唔捨得我咁, 扁咀唔開心, 想我帶埋佢出去~ 攪到我每日都唔捨得出門口, 會好掛住佢~~ 希望bb遲d可以早d 返學, 唔駛日日困在屋企咁慘慘la~

初試貓山王

最近元朗開咗間專食榴槤的甜品店~ 叫"貓山王"~ 裡面主打榴槤甜品, 仲可以俾你揀要D24or貓山王~ 有朋友試過後話一試難忘! 講到咁好食, 我同鄧生一定要去試吓la!! 我哋都好愛食榴槤~

店鋪就在"安娜餐廳"隔離, 鋪面好細! 放得幾張枱,坐得勁迫勁唔舒服.... 坐低後又好似無乜人理咁, 職員好似好忙咁=.="......

哩個係貓山王榴槤雪糕~ 真係幾好味!

不過佢有2個版本的, 一個係齋雪糕($28咁上下), 另一個係大少少, 多咗一支餅同埋下底有乾冰, 靚d, 但就變咗五十幾蚊一杯!

所以我建議大家食齋版抵d喎! 同埋買齋版外賣拎早食仲好! 因為店內真係勁迫, 坐得唔舒服勁想走!

榴槤班戟~ 唔算多cream, 但亦唔算多榴槤肉....不過不失啦~ size算細, 我同鄧生三兩啖就清哂~

2樣甜品埋單$107~ 唔算好抵食~ 又因為坐得迫, 所以麻麻哋想再嚟.......

介紹吓在長沙灣吉之島買的鬆記魚蛋~ 另外仲有豬樣的~

真係好鬼得意~ 不過可惜唔好食....好淡無乜味的......

純粹買嚟玩吓~ 或者tum吓細路都唔錯~ ^^

靚靚圍欄~

踏入8個半月, 我隻懶豬仔終於識爬喇!! 都係時候要用安全圍欄去限制佢既活動範圍~

因為爬多D對腦部發展係有幫助的, 所以我都叫工人姐姐唔好成日困住佢, 比佢出嚟爬吓, 唔得閒要走開先放佢落去坐監~

本來朋友都俾咗套2手圍欄我哋, 不過貪靚的我一直對鬆記的圍欄念念不忘.....因為可以襯返套膠地墊, 實在係perfect match! 日本袋購價連送貨要接近2千元! 見元朗鬆記專賣店賣$18xx, 所以決定元朗自取! 鄧生竟然無話太貴, 今次仲由佢送俾阿囝tim!

實太太靚喇!! quality仲好好, 完全無膠味~

可變形, 仲附有一條紙尺, 俾你量度bb的長度~

寶品從此被困了~ 佢當然係唔鐘意被困住啦! 一放入去就即喊......

多一個小朋友家裡真係多咗好多好多野!! 嚟緊仲有套玩具廚房同埋書枱仔.....我以前既玩具房同埋客房己經變咗雜物房喇!! 全部都係bb衫....同埋勁多紙箱! 好想搵一日的起心肝清吓啲野!

早幾日返緊工, 工人突然打嚟話bb在床邊撞親, 隻牙流血! @@ 吓!! 我勁擔心佢有冇撞甩牙!!

好彩最後知道撞到牙肉流血, 2隻牙仔無事!~~~

因為在床邊爬企係必經階段, 我唔可以阻止佢, 唯有買野包住~ 在$12店買的包圍, 頂得幾耐得幾耐, 希望佢唔好咬爛食落肚就得喇!

為聖誕做準備~

大家有冇發覺, halloween未過已經發現各大商場開始造緊聖誕佈置! 今日海港城聖誕佈置都亮燈喇!!~ 感覺上好似真係一年比一年早!

今年係寶品豬第1個聖誕, 所以我比以往更加期待! 期待帶佢去街影相~ 期待幫佢扮靚靚!^^

因為代購買carter's有時真係幾平, 買吓買吓我就買咗半打!@@

真係可以成個聖誕日日唔同聖誕look~^^ 

聖誕節BB始終都係著聖誕衫係最無敵的~ 包可愛!

寶品的童年回憶, 又點少得扮聖誕老人呢?

厚的在chickeeduck買, 薄的在花園街買~

我家的口水佬無口水肩唔掂~~ 半打聖誕口水肩希望夠用~

仲買咗一件我超鐘意的紅卜卜elmo晨褸~ 暖笠笠又醒神!^^

希望聖誕快d嚟~ 快d嚟~~^^