咁又8週年

又到結婚週年紀念日~ 不經不覺第8年喇! 今年因為小一面試, 加上多咗妹妹, 所以啲大假好唔夠洗, 我只可以慳慳哋請半日假慶祝, 想話去澳門歎吓都唔得....請2日假太奢侈>.<......

一路都無閒情諗去邊度食飯, 之前一晚才決定去海賀食鐵板燒~ 太遲訂位已經無哂窗邊位~ 

我發覺我哋年紀大咗, 在HK短短半日, 我哋係唔知做乜好! 睇戲又無戲啱睇~ 唱K又好似好悶, 得2個人~ 做運動? 都係咪攪, 日日身心疲累攰到C, 難得半日假真係唔想自己個軀體再勞動! 去酒店high tea? 又好似覺得啲甜品好飽好膩, 無乜衝動.....有啲地方又想等埋阿囝先一齊去....唉! 唔通我真係已經不再年青? 有時間都唔知做乜好! 可能真係唔去旅行就無乜好做~

最後我哋食飽Lunch都係在TST閒逛~ 閒日LADY M唔駛點排隊, 歎番2件cake~ 之後去反斗城睇吓單車(想買俾囝), 行吓街買吓野咁又返去接囝放學喇~ 

當然唔少得每年一隻的金花戒指~ 時間過得太快, 咁就第8隻~

阿囝晚上要補習, 所以我哋都無出街食飯, 在家切吓蛋糕就算~ 假日都經常出街食飯, 其實當晚去唔去街再慶祝都好閒~ 

我哋既生活, 就係不停為囝囡勞碌奔波, 無乜情趣可言~ 不過都好感恩有你哋, 令我哋既人生都變得圓滿~

結婚8年, 亦代表我哋間屋已經住咗足足8年~ 今年翻新油過樓梯同埋客廳的牆, 工程前後around 10日, 已經令全屋塵埃滿佈, 超恐怖........因為成屋雜物, 執野抹野真係攰到我CC吓! 好彩婆婆可以收留妹妹, 幫咗我唔少! 

未揉油之前, 無時間, 是是但但搵啲膠枱布cover住~ 

今次連啲燈都換埋, 想間屋光啲方便阿囝睇書~

煩完揉油, 又輪到換廚櫃~ 因為爛得太緊要, 有一隻門直頭開唔到~ 所以唯有成組換咗不锈鋼, 一勞永逸~ 不過本來舊的櫃內係塞滿哂沙煲冷餐同大量廚具雜物......我要搬哂出嚟都需要一番功夫.....真係好煩!

雖然好攰好麻煩又洗咗幾萬蚊..... 不過完成哂整乾淨後, 又覺得屋企睇落新淨咗, 人都精神D ^^"~ 

終於都有2nd in!

早前3間熱門學校都無緣進入2nd in, 後來收到心水學校2nd 通知的一刻, 真係超級開心! 

為咗哩一戰, 我哋都放咗好多心機去準備, 盡力搵題目陪仔溫書, 因為哩間學校2nd in係主要考學術的~

由屋企出發大概半個鐘就到咗學校~ 早咗到50mins.....操場上有書櫃, 小朋友可隨便取書睇, 解吓悶~ 

上禮堂報到等入去面試, 又係睇書打發時間~ 我突登唔帶啲攪笑or 囝好喜歡的書, 專登帶啲悶少少的俾佢睇, 因為悶書真係有冷靜作用ga~ ^^" 

面試長達50mins, 我同鄧生到學校的cafe, 食吓野等囝~

學校除咗有canteen, 仲有埋cafe~ 提供飯類、三文治、咖啡&花茶~ 環境好舒服, 價錢亦算大眾化, 十幾蚊一杯凍Latte, 好OK呀! 

連雪糕、cheese cake、冬甩都有! 為食囝見到必定會愛上哩間學校! 學校除咗硬件設施好之外, 連食物都咁多元化咁貼心! 媽媽我都覺得好正, 學生們好幸福呀! 不過我未深究小學部學生可否到此cafe消費^^", 真係考到再研究吧~ 

70幾蚊就咁多野食~ 鄧生飲咖啡, 我飲花茶~

見canteen的牆上貼有每日精選, 應該係for 中學部學生~ 價錢都唔算貴, 仲每日唔同款~ 

聽聞小學部的午餐飯盒係由學校飯堂每日新鮮整的~ 真係非常好啊! 起碼唔駛食隔夜餸先! 因為好多人都話某啲飯盒公司係早一晚整定啲飯盒, 第2日翻熱後再派送到各小學, 因為無可能一個朝早造得哂幾千個飯盒~ 變相學生要食隔夜野~

阿囝面試完畢~ 佢話自己今日做得好好~

真係問咗好多野呀! 英文讀文章, 聽故事答問題, 英文聽指做動作, ipad答題, 數學題4-5條, 排咭講故事~ 仲用英文問佢如果佢係飛機師, 咁佢會喳飛機去邊呢? 點解呢?

知道阿囝有一條文字數學題唔識答, 亦有英文字唔識讀.....不過我知道佢都已經盡咗力, 面試都無可能全部野識哂~

我哋有同佢練過重組句子and普通話, 不過囝話無考過呀~

買個朱古力冬甩獎勵佢, 順便tum佢講吓頭先考咗啲乜~ ^^"

回程又要滿足個囝去坐東鐵頭等~

之後去食個午餐, 就回家休息了! 其實寶品當日感冒, 個鼻好塞又流鼻涕....我都好擔心佢去面試識唔識自己拎紙巾出嚟抹鼻~ 最後總算順利完成面試, 可以回家好好休息瞓覺~ 這幾個月來唯一一次帶病面試, 都算好好彩~ 

之後幾日阿囝都有追問我學校有冇收佢, 佢都好期待個結果呀! 

希望會有好消息啦~ 真係好緊張! 越係鐘意間學校, 就越在乎個結果 >.<~ 同大抽獎唔同, 為咗心儀學校的面試, 實在付出太多, 好難一句平常心就消化到個事實~ 好老實講萬一無offer, 我真係需要少少時間去沉澱吓思緒.....入唔到心儀學校, 真係好似失戀一樣~

童油聖誕顯愛心

寶品一向畫畫同埋運動都唔叻, 本身我都好少參與相關比賽, 不過今次興趣班導師鼓勵我哋參賽, 因為經佢哋報係無需報名費的~ 既然免費, 畫張聖誕咭亦係能力範圍可以做到的事, 無需刻意練習, 咁就試吓參賽啦~

於是我就陪阿囝, 一齊設計, 一齊畫畫參賽喇~ 主力我畫, 佢填色~ 一齊諗吓有咩元素加入畫裡面~ 最後用咗1小時就完成咗!

結果被選上了, 得到K3組亞軍! 仲要出席頒獎典禮, 真係諗都無諗過~ 事實上我哋幅畫其實都係好低水準ga 咋 (我覺得)~ 啲小學組已經識得打哂陰影, 畫立體字, 用不同顏料去油~ 我哋係一盒粗crayon攪掂哂....^^" 非常幸運地被選上了~

活動係由慈善機構攪的, 頒獎禮都好認真, 有野食, 有攤位玩, 有表演等等....玩足一個下午! 好彩無帶妹妹去, 都擔心時間太長, 妹妹無耐性等待會嘈到人~

我哋以為淨係小朋友上台拎獎, 點知大會叫哂所有家長陪小朋友上台, 因為太多禮物獎座要拎, 需要家長幫手~ 早知要上台要影相我哋就著靚d! 真係casual wear咁出席咋^^"~ 不過在場都好多人係casual wear既~

寶品知道自己拎獎非常開心~ 小朋友都係鐘意拎獎, 鐘意成功感!

佢自己高舉雙手上台領獎, 自信爆燈, 真係頂佢唔住呀~ haha

大合照

得獎的畫會被印成聖誕咭義賣and 送出作慈善用途~ 

$5/張, 我哋都買返2打嚟送俾朋友and 留個念~

大會好細心, 有野食有野飲招待~

仲有其他擹位and 義賣檔~

本來寶品想試吓畫臉, 不過要排隊, 我哋唔願得等, 所以唔畫, 早啲回家準備晚上學游水~ 

平時去觀塘多數喳車, 不過寶品成日話自己未搭過觀塘線....難得去開觀塘, 就俾佢試吓啦~

滿載而歸~ 好多小禮物~

今次的獎品~

很開心很有意義的一次體驗~ 亦感謝老師當日的鼓勵, 才會換來今日阿囝的開心滿足~