幼稚園聖誕表演2017

寶品讀的幼稚園, 係好少安排表演or做show~ 每年就只有聖誕party先會有歌舞表演, 所以家長們真係唔會想錯過欣賞表演的機會~

上年K1仲細, 齋企住唱2首歌就落番嚟~

今年K2有唱歌跳舞~ 寶品跳舞有少少甩bit, 跳得麻麻哋~ 哈哈~ 唔知佢係咪在台上搵緊我(小朋友唔知家長坐邊度), 四圍望唔多專心~ 不過跳得唔好都唔緊要的, 邊有小朋友係十項全能乜都叻? 小朋友為今次表演都一定經過用心排練, 無論跳成點, 媽咪都一樣欣賞的~ 不過我就真係無感動到想喊的感覺, 因為跳jingle bell咁開心, 真係喊唔出喎~ ^^" 

假期前, 學校有一日食聖誕大餐~ 見到啲相片, 又有火雞又有美食, 感覺好開心~ 難怪寶品話最鐘意聖誕節~

表演完畢, 會在班房內開party~ 寶品好記得上年我去學校陪佢食野~ 可能真係每年只有1次哩啲機會, 所以小朋友印象都好深刻, 寶品好期待哩一日~

學校一向主張健康飲食, 上年party所有食物都係由學校廚房整的~ 不過我哋覺得同小朋友平時在學校食的食物一樣~ 欠缺色彩同埋新意~ 所以今年就改咗, 加入家長自己整食物~ 雖然唔算得上超級豐富, 但我覺得比上年已經好好多, 小朋友見到雞翼、啫喱糖、冬甩、雪人綿花糖... 真係會特別開心~ 係有少少唔健康, 但係過時過節無所謂la~ ^^" 

仲有意粉同埋聖誕蛋糕無影相~

其中一位同學仔媽媽好用心, 整咗好多甜品送俾全班同學, 真心佩服佢可以整到咁多野!! 如果我整野食叻啲就好la~ 我無乜野係拿手, 所以都唔好意思獻醜~

我係負責啲簡單野~ 腸仔 + 菠蘿腸仔~

其實當日要早起, 都係全靠姐姐幫手, 起勢咁煎腸仔~ 我就負責"吉"牙籤....^^" 

明年K3會係最後一年喇, 希望我仍然可以奉獻付出, 留多一點美好回憶俾小朋友~^^