你是你本身的傳奇

11月尾, 最令我們家開心振奮感動百感交集的事, 就係阿囝收到心儀小學offer!

經歷了足足一年密集式上課學習, 無數個夜晚一起溫習,去聽講座簡介會, 製作portfolio....真係100%工餘時間都俾哂個仔! 滿腦子都係諗關於考小學既野!

我哋目標好清晰, 心儀PKC, 所以一日未出result, 心情都難以放鬆!

到知道結果的一刻, 我無喊, 只係覺得如釋重負.... 心情有D複雜~

晚上返到屋企附近, 囝已經打開咗門迎接我, 大聲同我講: XX已經收咗我喇! 今日真係好美好既一日! :)

聽到之後我啲眼淚就湧住流出嚟喇~ T.T  我知道佢等咗哩日好耐, 佢一直都等緊一份肯定! 恭喜你呀! 囝! 你既付出無白費, 真正靠自己過2關去取得這offer! 媽咪真係好櫈你開心呀!   

寶品自己打電話俾公公報喜, 仲話: 2019年我會做一個好學生ga喇! 真係聽吓都覺得感動!

當晚好開心, 我買咗個蛋糕一齊慶祝吓~ 

雖然最後阿囝in過的幾間神校都係reject, 不過感受就好似中唔到六合彩一樣, 其實無乜野~ 因為早就心裡有數嘛~ 加上自己最清楚自己囝的性格和特質, 太傳統的學校唔適合佢, 暫時學術體藝又唔算有乜過人之長, 要在神校中搵到自信, 唔容易呀~ 所以我早就放棄, 無放神校為目標喇~

反觀PKC, 聽用家講, 小息小朋友係可以跑! 每日有4個小息(連lunch break), 每天早上都有閱讀時間, 多體育堂, 多outing學習, 無需呈分(鼓掌!!)等等....種種的安排, 都令我覺得學校好體貼, 亦好為孩子設想~ 我哋由當初完全唔了解間學校, 到後來愛上並定為目標小學! 

長路漫漫, 我絶對覺得孩子的感受都好重要! 讀書啫? 真係要咁大壓力? 如果終極目標係入三大揀好科的話, 我絶對覺得唔係淨係得"入名校"哩條路可以行~ 12年裡小朋友的心理發展, 親子關係, 都好重要啊~ 感恩我哋得到哩個offer, 阿囝不用接受傳統填鴨式教育, 真係大人細路都開心D舒服D! 希望下年入讀後, 我可以多啲分享學校的好~ 希望阿囝鐘意間學校, 愉快學習~

上星期六係註冊日, 早上幫阿囝請假唔學野, 想帶埋佢去學校cafe食吓野開心吓~ 點知原來cafe假日係唔開門! 好失望啊! 行咗個圈, 發覺其中一個canteen有開, 仲有少量食物賣~ 就坐低陪仔食吓野~ 

小朋友有得飲飲食食就開心~

星期六都好多學生返來玩課外活動啊~

去咗圖書館參觀吓~ 又大又舒適~

註冊過程都好電腦化, 只需1分鐘! 

離開時學校對面有小巴去大圍站, 20mins 一班車, 鄧生話試吓行落山!

見天氣都幾好唔太熱, 就陪佢試吓啦! 

最後用咗15mins 行到去大圍站, 都ok唔太辛苦~ 因為全程都係落斜~ 上斜就唔好試喇~

****************
只要相信夢  定能飛
高與低  得與失  即使無法躲避
你是你本身的傳奇  憑著你志氣會成大器
學會爭氣  未能放棄

就算今天的你哪年紀  活著就無悔地  做個你愛的你
請記得發夢  定能飛
高與低 得與失之間  無法準備
你是你本身的傳奇  前路裡振翅再高飛
即使不完美  只需經歷你自己
****************

好有共鳴的歌詞~
有志氣必能成大器, 加油啊寶貝囝!