妹妹豬第1個interview(PN)

近半年花太多時間在哥哥身上, 一直都冷落咗妹妹豬, 真係有啲內疚! 無數個星期六日, 我哋都顧住帶哥哥去面試班而無陪妹妹, 妹妹都係主力靠公公婆婆帶佢去街.....好彩佢仲細, 應該未識怪我哋, 同埋好快唔記得~ 唯有依加開始多D陪佢, 帶埋佢去玩啦!

出年希望妹妹返PN, 因為閒日太長時間留在家對住姐姐, 其實對佢發展都無乜幫助, 不如返學學習吓同人相處, 而且時間過得快d, 無咁悶~ 

劵校PN學位太少, 有offer的機會超微, 我哋連form都廢事交....好hea地只報咗一間私校, 預咗收就讀, 唔收就再報其他同區私幼~ 因為自己覺得唔係爭崩頭的名幼, 實會有位^^".....

1歳半的妹妹, 接受人生第1個interview~

其實佢個樣仲好BB, 而且真係乜都未識, 因為我哋係零Training......

估唔到學校係安排分組活動, 連名都唔駛講, 入到課室搵位坐低玩, 零交談~ 

家長+小朋友一齊合作整cupcake, 由普通話老師帶領教導~ 之後再由幾個英文外籍老師帶唱遊, 同埋玩咗少少遊戲~ 情況就好似平時同bb返playgroup一樣~ 全程老師在旁邊比分, 係完全無同家長對話or 問問題~ 最後老師派禮物俾小朋友, 就完成面試走得喇~

好明顯interview唔係考小朋友能力, 只係循例in吓~ 實質只會睇家長在application form上所填寫的background 同埋住址(睇吓住得近唔近)~ 家長素質如何, 有冇誠意, 統統唔care, 因為比分老師真係一句話都無講過~

咁就完成了! 希望順利有offer, 又可以煩少一樣野~^^

同場見到好多工人姐姐跟埋去interview, 幫手照顧小朋友.....其實一個小朋友面試, 真係需要工人去幫忙嗎? 我真係唔明白, 工人一齊去既作用係乜? 無咗工人1頭半個鐘都唔得?

另外有個家庭, 係父+母+婆婆+麻麻 (唔記得有冇工人), 最少4個人去陪一個BB interview! 真係嚇親~ PN咋喎? 係私幼先會俾你成棚人走入幼稚園去支持BB....真係太誇張! @@

過幾年輪到妹妹考小學~ 唔知到時個世界會變成點呢? 雖然出生率低咗, 但我覺得考直私的人數只會有增無減~ 始終會有幾千人, 甚至更多人想嘗試直私棄官津校~ 

未來的路不易行, 要好好計劃, 然後同妹妹一齊努力!