超耐無寫blog

種種原因之下, 令我失去咗寫blog的動力~ 有一段超長的日子無寫blog, 耐到連囡都生埋!

今年4月份生咗妹妹, 7月放完產假返工, 咁啱公司裝修+調咗位, 我個位無咁open, 所以依加可以有空檔時就寫吓野, 記低少少囝囡的成長回憶~ 加上今年決定出年全力為寶品哥嘗試考直/私小學, 我都想好好記低整個過程!~

依加哥哥4yrs7mths, 妹妹5.5mths喇~

哥哥好錫妹妹, 而且都無乜呷醋的行為~ 可能因為我仍然係大部份時間陪住哥哥, 妹妹交俾姐姐湊, 加上妹妹仲細又唔會玩哥哥啲玩具, 所以哥哥係好接受妹妹~ 哥哥仲叫我生多個朋友俾妹妹, 佢話妹妹得一個人無朋友.....haha

不過我係絶對唔會再生, 因為依加2個我已經頭都暈, 加上哥哥係繁忙兒童, 個schedule full到令我被佢公公婆婆姨姨投訴咗好多次..... 佢忙即係我忙! 所以真係無本事再生多個lu~ 封肚!

哩張相係今年6月時影的, 只係幾個月, 個樣已經變咗少少~ 哩一年覺得寶品大得好快, 高咗好多, 面形都拉長哂, 每幾個月又唔同咗樣咁~ 講野方面都進步咗好多, 3歲前仲係未太識講句子, 又成日講外星話~ 依加講野清楚咗好多, 甚至覺得佢幾有語言天份tim! 真係出乎意料之外~

臨返工前, 我哋帶咗寶品去咗幾日東京, 令佢留下非常深刻的印象, 因為去咗富士急的 Thomas land~ 一個佢夢寐以求想去的樂園~ 佢當然係開心到不得了~ 不過亦因為旅程中病咗發燒, 攪到我哋勁擔心!! 之後反反覆覆病咗成個月, 我仲驚佢係中流感, 成個人都瘦咗好多!(本來就已經唔係肥) 瘦到俾朋友話佢似第3世界啲兒童....手腳勁幼...抱上手輕飄飄咁! 好彩依加好番無事~ 可能多得婆婆燉冬蟲草湯俾佢飲, 個傻仔唔知點解肯食埋啲蟲! 一次可以食7-8條..... 可能啲蟲蟲真係有用, 可以保健~