考小學之路

最近係直私面試高鋒期, 每日都會睇到好多報導係關於小一面試, 成件事變得好受關注好緊張~ 近年直資/私立小學都有被吹捧既風氣, 不過的確直私係有好多吸引之處, 而且考完唔收都無乜大損失, 最多咪面對現實大抽獎~ 所以報考的人數亦一年比一年多~ 人人都話起碼報10間, 當100個人裡有90人都咁做... 啲面試講座講師全部都勸家長報多幾間當買保險當rehearsal, 慢慢就好易被感染, 覺得報10間8間係好"正常"...

由寶品好細個開始, 我就買好多圖書同教材俾佢, 10個月就開始上playgroup, 由K1開始keep住有學英普, 一直以來既目的都唔係為考名校, 只係深信語言發展越細個開始會develop得越好~  一直以來, 我哋都無跨區考學校的念頭, 最多諗吓去隔離區租間樓, 要個地址嚟抽奬~ 直到今年身邊好多朋友啲囝囡(兔年)考學校/大抽獎派位, 眼見聽說太多佢哋既經歷同埋意見...我哋開始識得擔心! 開始同鄧生一齊研究升小問題~ 以自己姨甥仔就例, 就正正係一個真實的case, 派咗去第尾志願, 天水圍短命寶校! 父母當然第1時間陪佢四出扣門, 一共見咗8間元朗區小學, 全部無下文... 其實有冇offer未必關小朋友能力事, 衰啲講個事實出嚟, 係所有扣門位都被人事/校董會hold起, 扣門程序只係做樣, 學位早已被內定哂! (官校無校董會就會公平少少)  又或者用人事留位真係元朗區的獨有文化啦~ 平時睇blog又真係見有不少市區人係扣門成功, 感覺無元朗區咁黑暗~

眼見大抽獎+扣門種種不公平、睇彩數既玩法...我真係唔係太想阿囝接受哩個安排... 於是開始去了解直私學校, 問朋友(過來人)意見同埋小朋友讀成點~ 好短時間內, 我哋2公婆一致決定跳出框框, 決心去試直私小學! 最估唔到係鄧生比我更進取, 因為以前佢成日叫我唔好太緊張, 話 "如果係讀到書, 就算在元朗讀都一樣考到三大!"   好記得佢成日講哩句說話~ 不過現實係殘酷, 唔識人又唔好彩的話, 元朗1、2線都無得你讀! 寶校未必一定差, 但如果有機會自己爭取學位, 點解唔試呢? 而且直私的課程可能更有利子女發展tim~ 不過返學搭車接送問題家長就要自己諗辦法! 哩啲都係後話, 有offer先諗都未遲~ 但最近睇電視介紹位於柴灣的"港同",   訪問該校的家長, 一個住馬安山, 一個位紅磡!   真係估唔到原來咁多家長咁遠水路送小朋友返學!  

寶品讀緊的幼稚園係happy school, 記得有朋友同我講過, 有幾多個XXX可以考到名校offer? 我都覺得讀邊間幼稚園同埋家長background都係取錄因素之一, 但又唔係絶對既? 正面啲諗, 面試表現同態度先係最關鍵~ 而且小一面試好多都有2-3 round, 唔可能靠天才波好運或家長background就可以過關斬將! 無番少少實力點得呀? 有聽過家長講話學校收某位學生, 因為佢daddy做牙醫...其實學校面試應該係多方面計分, 父母係專業人士唔排除可能有得加分, 但一定唔會單單睇家長職業咁少野~ 有啲人真係一句說話就抹殺哂人哋既栽培同努力!

有時好多人會輕易幫別人加標籤, 只見到表面, 就好敏感地標籤他人為怪獸家長~ 通常學得多野、學得深、報好多間幼稚園 = 怪獸~ 我就唔會理會其他人點睇點講, 預咗無可能每事都可以得到別人認同~ 而且把口生喺人哋度, 話人怪獸的, 講批評說話又唔駛負責任既? 留言講乜都無責任!   梗係可以好潚灑講乜都得~

所以無需介懷啦~ 相信自己, 對得住自己囝囡咪得~ 家長係最了解囝囡的需要同埋能力,  無需要同局外人交代太多吖?   

寶品係蛇B, 出年先會面對interview, 不過我哋相信機會係留俾有準備既人~ 而且無論語言能力, 對答技巧, 分析能力, 行為禮貌等等....全部都係要時間去浸出嚟的, 絶對無速成班! 所以哩一年會慢慢幫佢改善不足, 都幾多野需要改進!

遲啲再慢慢講點樣去準備迎接面試啦~ 唔多唔少會有啲壓力, 不過我都希望可以繼續work hard play hard~ 我自己都好鐘意陪仔去玩去體驗, 用行動用身體去感受新事物~ 順便享受吓家庭樂~ 好記得今年大住個肚, 準備入院開刀前一星期, 都仍然堅持去沙灘玩掘蛋, 全個復活節假期節目排到密麻麻, 就係想生BB前陪寶品哥玩多D! 當時好擔心我坐月佢無得去玩會好悶, 結果最後佢都唔悶, 因為成日去咗婆婆屋企, 跟公公婆婆去街~ 公公對寶品好好, 會陪佢去排隊玩政府的兒童遊戲室, 又帶佢去公園玩, 好似看馬騮咁, 少啲力氣都追唔掂~

回顧吓哩一年部份的美好回憶~ 短短一年, 寶品俏俏的又長大咗不少~ 

 海迎灘住camper van~ (當時好似有咗6-7個月, 但個肚算細)
架車啲床真係好細又唔好瞓, 不過寶品覺得好特別~ 果度有草地有沙灘比小朋友跑吓玩吓, 晚上可以在車外bbq~

平安夜, 同真聖誕老人影相~ (有證書, 鬍鬚頭髮都係真的, 夠肥, 講英文的) 其實我唔係太鐘意啲好hea裝扮的聖誕老人, (平時去食buffet出嚟派禮物影相果啲) 咁假..... 可能會令小朋友的幻想破滅~  所以貴少少都帶佢去搵個真啲既影相~

大棠冰雪節~ 第2年去哩度玩喇~ 可以感受冰冷同玩吓冰滑梯~ 可惜今年做唔住執咗, 睇怕以後都唔會再攪ga喇~

黃金酒店的鯊魚playhouse~
book咗個復活節package, 食埋住埋玩埋, 非常開心~ 我覺得黃金好多節目啱小朋友玩, 係非常好的親子酒店~


澳門滑草~
識我的朋友都知道我哋一年會去幾次澳門, haha~ 因為我家鄧生好鐘意去澳門hea~ 佢話啲酒店抵住過HK好多, 而寶品更加係"超級"鐘意住酒店, 去澳門算係容易安排容易去~

元朗448農莊~ 都幾多野玩, 不過記住秋/冬天去! 上次夏天我哋兩母子被蚊/蠓咬咗幾十啖呀陰公!! 搽蚊dream係完全無驅蠓作用....

今年花展~ 又係大肚中, 果日行咗超耐!

大樹先生~ 唔需要多介紹啦? 今年去咗2次~ 話6歲以下方可入去玩, 所以大啲就無得玩, 趁仲細咪玩多幾次~ 

流浮山農莊~ 居於元朗, 其實去各大農莊都算方便, 加上寶品鐘意動物, 所以我哋都成日陪佢去農莊玩, 不過都係果句, 秋冬去會好啲! 夏天游吓水好過la~ 唔好貼錢買難受~

錦田環保農莊

香港公園~ 有沙有長滑梯有韆秋, 好好玩~

第1次玩掘蛋~ 記得買票用咗二百幾蚊, 掘幾分鐘就玩完......有少少失望!

坐水晶巴士! 寶品非常難忘的體驗~ 貴咗d, 悶咗d~ 不過乜到試吓, 最梗要小朋友開心~

顯達鄉村俱樂部~
一個字 : 舊! 團購見幾抵就買試吓, 住咗一晚, 房間好舊, 又無雙人大床, 真係無乜吸引力再嚟住..... 好彩都有幾個巨型彈床玩~ 但天氣勁熱, 玩一陣就全身大汗了~

最近去長沙政府渡假屋玩咗2日1夜, 都係好特別好原始既體驗.....haha~ 我哋唔知幾多年無瞓過硬板床喇!! 不過個沙灘真係好正~ 又可以順便坐吓blue taxi~

九龍站的港鐵展覽~ 唔駛錢, ok la~   鐘意港鐵的小朋友一定要去~

奇妙之旅~ 可以同Alice一齊坐coffee cup, 實在太奇妙~~

住咗新的探索家酒店~ 普普通通不過不失咁啦~ 但有啲貴....

東京迪士尼樂園~ 偏偏就係哩日發燒, 完全不在狀態, 我哋玩咗好少野咋~ 希望下次帶埋妹妹再去過~