文大小姐: 整合味道杯麵+親子整月餅+童夢城

見GROUPON有個”整合味道杯麵+親子整月餅+童夢城” 的團購~ $320 (1成人+1小童), 有咁多野做, 價錢都OK~ 反正全部未玩過, 所以就想試吓喇~

終於搵到個機會去搭機場快線喇! 港鐵迷寶品一直超級想搭, 但係因為元朗去機場, 坐機鐵根本就唔順路, 佢daddy係絶對唔會拎住啲行李陪佢走出九龍搭機鐵去機場…..價錢唔係便宜, 仲要花多咗時間~ 所以一直以來都係拒絕阿囝的要求, 每次都只會貪方便搭的士~

今次我約埋朋友一齊去, 鄧生無去, 因為加多一個成人要加$160, 齋入場唔包多一份材料, 都幾搵笨, 所以決定daddy唔好join! 星期六中午學完野, 就由荃灣出發, mtr 去青衣轉車, 搭1個站機鐵前往機場~ 車費好似係單程$65成人, 小童半價~ 坐十零分鐘就到機場~

全個搭車過程, 寶品係非常極之興奮! 不斷跟住啲指示牌去搵機鐵, 見到佢個開心樣, 真係覺得此刻無價~ 青衣站近尾站所以上車時已有少少滿座, 我同囝要分開坐(隔幾個坐位), 寶品講野好大聲, 我聽到佢同隔離個鬼佬吹水, 問人哋會在邊個站落車! Airport or asia world expo? 雖然有時聽到佢文法上有唔啱, 不過free talk我覺得暫時唔駛打斷佢執得咁正, 怕影響佢自信~

落車時先知道左右2邊車門係會同時打開, 一邊去T1, 另一邊去T2, 非常方便~

第1站先整咗合味道杯麵先~ 其實畫吓個杯, 在form上tick要咩湯底咩材料, 交比工作人員就會幫你照單執藥~ 我哋好快15mins就玩完~ 因為無乜美術天份, 是但畫完就交貨 ~ haha ~ 不過囝大咗, 依加都識少少中文字, 所以睇得明有咩材料揀, 又識喳筆畫吓野, 所以都啱佢玩吓既~

另一個環節係扮小廚師親子整脆脆奶皇月餅~ 材料份量已經量好哂, 猜幾猜, 包住啲餡入模, 壓一壓就攪掂~ 工作人員會幫你拎去焗~ 寶品回家試味話覺得好好食, 我就覺得…..一般la~ ^^”

之後仲分別扮咗救護員同消防員(佢自己揀1種職業)~ 家長行行企企等佢半小時, 然後出嚟又影吓相咁~ 每個section 45mins~ 其實扮完救護員+廚師寶品已經好攰唔想玩, 諗住拎d人工去換個飲品比佢醒神吓la? 點知係唔夠錢! 要打3份工先夠錢換罐可樂! 寶品勁無奈, 我諗佢終於知道搵錢辛苦了~ 哈哈~ 見佢咁攰(無瞓晏覺), 就買咗包oreo餅比佢食少少充吓飢先~ 最後完成哂儲夠錢可以換可樂(仲要另加$6), 佢就勁開心~