終於放暑假

當其他人都開始陸續開學時, 寶品剛剛才開始放暑假!

佢哋學校出名暑假短~ 不過對在職爸媽嚟講, 確係好事! 事關淨係放2星期暑假我已經好頭痛~今年無時間去旅行, 就要諗有乜summer course 可以報~ 揀咗2日ocean park summer day camp, 2日梓鋒教育暑期班~ 其餘日子就公公婆婆湊 or 留在家中喇~ 公公都好好, 成日帶佢去街去公園去圖書館~ 如果哥哥留在家, 妹妹就會全日都唔肯瞓覺, 唔夠瞓又會好扭計~ 

住村屋無會所, 無得好方便咁落泳池游水~ 最近每晚都同妹妹在按摩缸玩吓水~ 

放假想去沙灘玩吓水, 不過因為舊曆七月, 鄧生話唔好游沙灘~ 唯有等八月la! 

想做的事太多, 但時間太有限~ 

寶品運動一向唔叻, 有時仲覺得佢好易仆親, 手腳調協好似幾差吓~

最近幫仔報咗k pop班~ 試咗一堂佢話ok 肯繼續學, 所以又試吓玩吓跳舞~

其實有諗過俾佢學吓踢波~ 但時間非常難遷就, 地方亦有concern..... 唯有自學住先~ 有時daddy會陪寶品練吓波~ 但都係放工天都黑哂先嚟踢~ 希望對佢手腳協調會有改善~

之前我plan咗希望仔在面試交portfolio前可以完成GAPSK 高級 + Trinity GESE grade2, 最後剛好如期考咗, 而且都拎到好成績~ 老實講過程係辛苦的, 要出出入入上堂, exam前又要抽時間溫習, 好彩最後都完成目標, 安落哂~ 

至於starter我哋選擇暫時唔考住, 因為真係兼顧唔到太多野~ 我相信無cambridge cert都唔會對面試取錄有太大影響~

暫時唔駛再考cert, 大家都鬆哂~ 

其實考cert除咗方便整portfo, 證明小朋友係識基本英普對答之外~ 都係練習面試的好機會~ 所以我都唔介意逐級考, 每次面見exam, 仔都可以吸取經驗, 習慣有禮貌地回答考官的提問~ 其實加加埋埋, 囝已經有6次考哩類speaking exam的經驗~ 真係會一次比一次淡定ga~

寶品由K2開始上公文數學~ 初初開始時真係好辛苦好唔習慣~ 因為每日要做一份20頁的數學功課, 有時真係會做到喊....睇見都心痛~ 但阿囝真係算好乖, 咁辛苦都無話唔學, 默默地每日做一份, 日子有功, 依加已經唔會再為做功課而喊, 而且速度都快咗, 大部份時間都唔需要太勞氣~ 亦非常興幸寶品讀的幼稚園只有星期五有功課, 幫輕不少~ 

其實學過之後, 我就覺得公文的操練方法太辛苦, 量太多! 不過鄧生堅持覺得可以打好數學基礎, 係辛苦, 不過會有用, 同時練埋專注力~ 現階段仲未可以睇到公文操練法到底有冇成效, 可能要好多年後先睇到~ 不過鄧生讀書時數學又真係幾叻, 係佢強項~ 希望寶品都可以一樣啦~ 寶品最近成日話想做建築師, 因為佢好鐘意高樓大廈~

唔知點解, 阿囝勁鐘意ICC~ 早排為滿足佢, 我哋就俾錢上SKY100睇風景~ 如果唔係為阿囝, 我諗真係未必會上HK的觀光塔.... 上到去都係四圍睇吓風景, 影吓相無咩好做~^^"

但對小朋友嚟講, 可以搭lift上頂樓已經好high~ 阿囝好開心~

眨吓眼個囝就5歲半! 真係大得好快~~ 餘下1年幼稚園生活, 真心希望佢可以開開心心~ 因為現實所見, 上咗小學學業係好難輕鬆! 上咗小學就無咁多包容! 

有得玩就盡情地玩la!~