2018 大阪京都遊

近幾年我都有印快圖美相簿去記低啲旅遊相片同埋點滴~ 近日揀開相, 又在blog記錄吓今年4月份另一個日本trip~ 就係一行15人的大阪京都之旅~

今次同一班識咗10幾年的朋友第1次咁多人一齊去旅行~ 佢哋係我最癲最好笑的一班朋友~ 6日旅程中笑料百出, 真係好深刻又好開心的回憶~ 今次我單拖帶仔去參與, 未試過出遠門無鄧生在身邊, 本來真係幾擔心ga~ 我又已經好多年無去大阪, 不過朋友們plan好哂行程, 乜都book好哂, 又搵哂路~ 我哋不用操心, 跟住玩就得, 簡直係唔駛帶腦去旅行咁! 好爽~ haha~ 

不過連日來都趕行程行咗好多路~ 搭咗好多唔同既鐵路, 轉嚟轉去, 仲搭咗好多次巴士~ 滿足哂寶品la~ 真係一個幾好的體驗~

大阪必影的固力果人~

話明佢哋係最癲最玩得, 所以花紳野都特別多~ 出發時十幾人每人一個爆炸頭, 唔同顏色, 幾觸目又攪笑~ 我哋仲有每人一件團tee, 團名叫"有今生無來世旅行團"~ 

我10年前去清水寺無著和服, 趁仲未算好老, 今次真係想試吓! 

3x歲人先嚟和服初體驗.... haha~ 

大家著哂唔同顏色和服一齊影相, 好靚好有紀念價值!

我哋在"夢館"租衫, 為方便, 我加埋錢化粧set頭~ 早上10點去到, 都勁多人早過我哋到~ 好似無乜靚款好揀咁, 最後是但揀, 出嚟既效果都唔錯喎! 和服真係越花, 越撞色就會越好睇~

至於寶品, 好幸運一去到已經見到有一套青綠色男童和服, 啱哂佢! 我覺得好靚好襯佢呀!perfect!

全部人換衫攪掂哂要2小時! 真係辛苦同行的男士同小朋友! 要呆等咁耐~

之後我哋在中午時份, 著住套咁熱既和服行上清水寺....真係熱到high high!!!

各人一去到清水寺附近都即刻買雪糕食, 全條街都有綠茶雪糕賣, 正呀!~

雖然係4月時份, 但係天氣都好熱, 當日行咗幾個鐘, 真係好辛苦~ 不過影咗好多靚相留念, 值得既~

有一晚我哋去行激安購物, 寶品見到門口好大隻企鵝, 好開心咁問我係咪上樓上睇企鵝! 

佢以為係企鵝館之類~ hahahahaha~ 又真係幾容易令小朋友誤會~ 

釣魚船屋食飯兼釣魚~ 不過其實好難釣! 我哋試釣一輪後, 就叫職員幫人釣~

我覺得唔算特別過癮, 下次可以唔駛嚟~^^" 反而忍者餐廳過癮d, 有忍者表演, 個格局又幾得意~

淡路島牧場, 搾牛奶~ 我無try, 阿囝就有試玩~ 同動物有關既活動佢都好肯試~

渡月橋

嵐山火車~ 買相~

男子組玩孖寶賽車~ 女子組去shopping~ 小朋友/無車牌都唔喳得~ 

士多啤利溫室, 任採任食任飲~ 可以食埋蛋糕同雪糕, 好飽! 

在京都喪食喪買綠茶野~  

仲有好多行程未能盡錄, 真係非常充實的6天~

今次因為跟大隊一齊買機票, 係我第1次坐廉航~ 好彩來回都無delay~成4個鐘機程, 無電視睇我都好擔心個囝頂唔頂到悶! 我無俾電子產品佢睇, 好彩都安然渡過~ 餐一定要叫, 驚囝肚餓, 一齊食吓飯打發吓時間, 不過都係唔好味的~ 

問阿仔鐘意hk express 定 hk airline, 佢都揀hk airline~ 小朋友肯係鐘意有餐有甜品有果汁有nuts 有玩具送la~ haha~ 其實mark位叫餐同埋行李收費加埋都唔係平過普通機票好多~ 加上鄧生俾錢, 下次真係未必再坐hk express~

大阪, 後會有期~ 希望下次帶埋妹妹去~