為面試而奮鬥~

7月中, 順利地收到寶品第1個offer~ 當時係放工後, 我哋2公婆聽緊面試講座, 好多朋友紛紛在whatapp問大家結果, 我check email見到被取錄的一刻, 老實說, 係好開心的! 因為只要有1個offer, 我哋就有更明確的面試去向, 阿囝可以唔駛in太多間, 餘下我哋所揀選會交表的學校, 如無意外就只有6間~ 

有啲朋友聽到後, 話我哋投資咗咁多, in咁少好浪費, 應該報多幾間試吓~ 當練習都好! 

如果未有offer, 相信我哋一定會報over 10間~ 但既然已經有offer就唔玩咁多次面試了~ 始終我覺得面對面試係有壓力的(至少我有), 準備功夫要足, 小朋友去到並唔係玩, 而係考東考西, 問東問西, 我唔覺得自己小朋友係enjoy去面試果type....而且最後出結果, 我又怕太多reject我會未能釋懷.....當年考幼稚園都領教過(考4間劵校4間都無offer), 真係會有失落~ 今次仲要比當年付出10倍心血去準備面試 (當年係無準備過), 我真係唔想為自己製造太多打擊~

所以揀 6-7間心水小學, 盡力去in, 對自己有個交代就得~ 當中有神校有新派學校, 仲未知會唔會撞期, 避到盡量避, 真係撞咗都係天意, 認命la~

臨近面試高峰期, 阿囝個schedule排得滿滿, 無咩事都唔敢請假唔學野, 因為補堂非常麻煩.... 上一次為咗英文考試miss咗一堂面試班係講黃錦輝面試技巧, 即刻覺得好可惜! (過咗個topic就補唔番, 下次講第2間) 真係唔敢鬆懈, 捱多2-3個月應該會海闊天空, 可以盡情去玩! 期待秋天的來臨, 希望會係收成期~

以往每年暑期我哋都會住吓酒店四圍玩, 今年唔得喇, 好似每逢假日都總有啲堂要上, 有時只能free半日or 幾個鐘~ 遠既去唔到, 附近商場有咩玩就帶佢去玩吓放吓電, 或者快閃迪士尼~

自己有啲後悔join咗某個面試班, 覺得學唔到乜野之餘, 浪費哂我哋寶貴的時間! 只怪自己貪報得多堂會有9折(4百幾1堂, 少數怕長計嘛...), 所以一次過報咗半年!! 我唔可以話囝一啲得著都無, 只係試過之後真心覺得唔值~ 希望過幾年輪到妹妹考學校, 我哋唔會咁失賊, 試幾堂啱上先再俾錢~

 

面試班最近好多模擬面試~ 其中一個係250個學生一齊去酒店模擬interview~ 

價錢都好貴吓....不過唔好話無用呀~ 從錄影中, 見到自己個仔面試的真面目, 有啲好好笑, 有啲會好嬲.....haha

寶品全程都無乜笑容,  遇到啲難題會鄒哂眉.....而且答得唔算好好, 所以我唔覺得自己個囝會enjoy面試~ 邊有小朋友會好鐘意去做題目答野.....

不過佢有啲亂吹的答題我哋真係笑咗, 唔知點解佢會咁答~

平時上堂都會有片睇的~ 小朋友真正的一面, 係勁多小動作~ 睇完家長真係會好擔心....有乜辦法唔緊張? 講緊in 神校, the best of the best! 我個囝咁樣真係會有希望? 唉~