迪士尼哈佬喂2017

寶品4歲前, 其實只係去過1次香港迪士尼樂園~ 我哋無乜衝動想去, 唔係因為唔好玩, 而係覺得入場費太貴, 1家3個人入場連泊車食野買野, 好高消費~ 其次係小朋友年紀太細, 去迪士尼的得著比較少, 又無耐性排隊, 得個攰字~ 所以我哋係極少去迪士尼, 有時間反而想去Ocean Park多d~

今年我哋破格全家人買咗金咭年票~ 主要係因為8月時入住迪士尼新酒店, 諗住一場去到順便入園玩埋, 因為寶品已經4歲幾, 好多games都啱玩了~ 加上貪圖金咭的生日餐飲折扣, 所以鄧生主動話買年票~ 今年將會係非常忙碌的一年, 希望我哋都會去到3-4次, 唔好浪費咗張年票~

適逢阿囝學校假期, 無乜特別節目, 所以我哋就請假陪仔去體驗吓迪士尼Halloween~

上午要去補習班補堂(阿媽係唔會放過任何補堂機會, 因為有時請咗假去玩, 攪到好多堂要補), 之後我就帶仔坐MTR去欣澳, 鄧生自己喳車入園~ 寶品恨咗好耐想坐迪士尼線ga喇~

因為鄧生未到, 見有時間, 我哋就坐回頭車, 可以在無乜人的車箱內影到夠~ 滿足咗阿囝~

見有Halloween版米奇米妮, 就排隊影相~ 點知一排就排咗1個鐘! 仲要係曬住咁排.......今次鄧生又買咗全年photo pass, $590 可以取哂全年所影的相片的soft copy~ 其實唔算太貴, 因為比錢studio影全家幅仲貴~ 不過首要條件係...你要願得排隊咁先會有相!! 為咗靚相, 我諗我哋都願得每次排1-2隻公仔影相既~ ^^"

因為係學校假期, 所以有幾位同學仔都入咗樂園玩~ 寶品見到好朋友後超級開心興奮! 其實佢知道朋友入咗園, 已經問咗我N次佢哋喺邊..... 依加無論去邊度玩, 佢都好鐘意有朋友陪伴~ 所以阿媽我成日都要搵腳去玩, 因為有伴阿囝係會雙倍開心ga~ 

阿囝越大, 開始重視朋友多過媽咪, 佢話唔駛我陪佢玩, 佢想同朋友一齊坐一齊玩......又成日問住啲朋友去咗邊? 咁快就唔要我了~~ >.< 個心飛走咗~ 

又凍又硬的壽司餐.....超難食!

夜晚無咁熱, 就幫佢換咗Halloween扮野衫~

睇惡人巡遊~ 寶品對D恐佈公仔無乜興趣, 反而下午睇迪士尼公仔巡遊佢仲開心~

 Hea玩咗半日, 放緊煙花時, 我哋就趁人少離開lu~ 下次聖誕再嚟la~

九巴屯門pop-up store

今個星期在Vcity有巴士pop up store~ 上網見會有玩具巴士賣, 所以放工就帶寶品去睇吓~ 見到件車長制服, 好鬼正~ 好想買!

閒日晚上去到, 現場都有不少人~ 有大巴士玩, 行上行落寶品已經覺得好開心, 佢把聲勁嘈……

九巴即將會改頭換面, 由香檳金色變為鮮紅色~ (其實我覺得香檳金咪幾靚….唔轉好過轉)

啲九巴產品係有少少貴, 玩具巴士更加貴! 不過個仔鐘意, 都買2架車俾比佢玩吓~ 但係有架特別版968 真係好靚, 對元朗人嚟講又係特別大情意結~ 由細搭到大~ 阿囝都好想要, 之但係價錢係$465! 買架咁細的玩具巴士, 真係好貴….同埋阿囝仲未識愛惜玩具,   未明白玩具係有觀賞價值, 屋企啲車都跌到甩皮甩骨.... 真係唔捨得買嚟比佢催殘….放棄無買~




哩個size的大巴士有3款, 每款$200~ 我揀咗2架 (紅+金)~

巴士車長制服, 短袖($150), 長袖($160), 風褸($300), 仲有波衫賣(2百幾, 但唔太靚)

啲車長制服真係好可愛! 但又覺得可能好少機會著, 諗來諗去, 最後決定買風褸, 因為多啲機會著嘛~

青bb風褸, 啱哂寶品哥~

月曆$58

膠folder $20~ 見幾靚又實用, 所以買哂 4款~

 行李掛牌~ 另外仲有單行薄賣~

買滿$400, 可以試玩VR~

去屯門的另一目的就係帶仔去買冬天泳衣, 要買套有抓毛底的~ 依加Aeon做8折, 折後4百幾~ 保暖功夫一定要做足啲, 唔好冷親最梗要!!

童裝隔離就係玩具部, 寶品又去巡視吓有咩買~ 最後我只係買咗一件新幹線配件俾佢, 其他唔準買~ 

不經不覺咁就用咗2hrs....勁攰, 因為番完工, 同埋我地啲戰利品真係勁重! 

坐低食啲野, 之後就搭西鐵返屋企lu~ 寶品當晚少有地閒日有得同媽咪去街, 心情極靚~

小學簡介會

自從生咗妹妹之後, 我同鄧生去街拍拖食飯的次數係極少! 親子都唔夠時間, 都唔好諗兩公婆去拍拖啦…… 依加放假唔駛學野的時間都會想把握機會親子~ 不過估唔到, 聽小學簡介會/面試講座會造就咗機會比我同鄧生去拍拖食飯! ^^ 好彩有阿媽幫手睇住對仔囡, 咁我哋先可以一齊去聽~

放工趕住去青衣聽分享會(8點開始), 去心粥館嚟個快食~ 點知就係食完哩餐, 肚痛到我死! 最後聽完要飛的返元朗....>.<

對於面試講座, 我覺得家長係應該要聽吓(如果費用唔貴)~ 了解多啲直私面試or扣門的玩法同埋要求, 知多d咁到時就無咁慌~ 但就唔駛俾太多錢去參加哩啲講座, 因為聽得多會發覺離離去去大致上講啲野都差唔多~ 要知面試技巧, 就會tum你報面試班~

至於需唔需要上面試班呢? 我覺得視乎小朋友的性格同埋能力, 如果小朋友本身都”好定” (ß---哩點係非常重要!! 聽聞通常多offer的學生都一定係”好定”) 學術能力已經有番咁上下水平, 對時事又有一定認識, 咁就唔上面試班都無問題~ 本身夠smart, 都唔需要花哩啲錢&時間, 臨面試前上幾堂實戰班就夠哂~

但如果你覺得自己小朋友仲有好多不足, 好多基本要求都未達標, 咁咪上吓面試班~ 提升吓水平(點都有少少野學到掛?) 同埋令家長個心定d~ 安心d~  我哋倆公婆都覺得個仔專注力好有問題, 無時停又唔留心回答問題, 所以一致覺得佢係有需要去面試班執吓行為! 無論最後有冇offer, 幫到佢改善行為的話, 咁錢都係洗得有價值的~

今次聽咗一位blogger的面試心得分享會, 覺得都袋到野落袋~ 講啲野夠貼地~ 了解多咗關於面試/扣門/插班的玩法~ 同埋知道”谷”的小學可以有幾谷…. 聽完我真係覺得依加啲小朋友好慘….其實唔係間間直/私小學都一定比官津校輕鬆! 揀之前真係要睇清楚諗清楚先好揀~

星期日去咗SMC的簡介會, 對這間學校的印象有所改觀~ 覺得此校有好多可取之處, 係”真”happy school~ 而且有好多唔同國藉的學生/交流生, 我覺得寶品會鐘意~ (佢在街上經常主動同外國人傾謁, 可能佢覺得外國人nice d?) 遲吓交表先帶佢嚟睇吓間學校啦~ 始終3小時的簡介會太長了, 雖然小朋友可以在課室睇戲等候, 但我都擔心等太耐, 唔想小朋友覺得悶會有反感~

揀學校我都好關心學校位置, 因為我哋都無乜可能自己車出車入送返學放學, 就算返學送到, 放學點呢? 所以都盡量會試一啲無咁遠的學校~ 太遠的(過海), 就算讀到都未必好, 太勞累都會影響小朋友學習~

再睇吓幾多人爭一個學位? 唉….機會率好似仲細過男拔?! 真係即管一試, 完全唔敢抱咩期望……

考cert重要嗎?

現今的小朋友, 好多都細細個就要面對考試~ 一般4-5歲都會開始考cert, 目的唔需要多講, 都係不外乎為考小學/ 扣門作準備~ 

如果問我考cert重唔重要, 我就覺得唔係必須的, 因為好多學校依加都話唔睇portfolio, 主要睇面試時的對答就已經知道小朋友的語言能力, 有冇料到一試就知~ 

學校唔睇cert, 咁點解仲要去考cert呢? 因為唔係所有學校都百分百一齊唔收portfolio! 有啲學校1st in唔收, 但2nd in會收....而且好多時扣門或小二申請插班, 都係要附上portfolio! 好現實咁講, 如果係要玩哩個game, 2-3張有力的, 認受性高的證書, 都要考嚟旁吓身, 不然我真係唔知放乜野落份portfolio好! 就算我介紹自己小朋友對語言or音樂or運動有天份, 咁都要有證明ga? 唔係一味吹水, 放幾張相, 校長老師就會相信!

不過cert係唔需要鬥多, 多未必一定被欣賞, 反而會令學校覺得, 你花咁多時間去應付考試or 比賽, 咁仲邊有時間去玩去親子? 啲豬肉獎就更加無謂塞埋落去~ 無乜作用之餘, 老師睇得多都會覺得煩~ 

我個人就覺得TRINITY GESE同埋普通話GAPSK都係比較容易應付的考試, 對4歲小朋友唔會造成太大學習壓力, 不用書寫, 只考說話&聆聽能力~  最少4歲半的寶品都覺得好輕鬆, 完全無話辛苦~ 小朋友只要多聽多講, 一般都可以有唔錯的成績, 算係好易考的cert~

不過當寶品TRINITY第1次考試拎唔到distinction時, 我係真係有失望的! 因為我覺得佢既水平係可以拎到distinction (傳說中係好易拎distinction)! 後來慢慢自己諗通咗, 我係應該要學習放低分數, 唔好用分數去衡量小朋友既價值! 其實考試的目的唔應該係淨係為張cert, 最重要係小朋友為應付考試的過程其實吸收咗知識, 又提升咗能力! 單獨面對考官對答, 仲加強埋自信心! 哩啲先係最有價值的!! 小朋友被無辜辜的推去面對1個接1個的考試, 家長係唔應該在分數上比壓力~ 應該支持並讚美佢為考cert所付出的時間&努力! 

台上3分鐘, 台下10年功~ 為應付哩個5分鐘的考試, 上咗10幾堂trinity班.....

不過寶品本身都唔怕羞, 佢好淡定, 入去當傾謁, 非常輕鬆的話下次再嚟哩度答問題~ 

態度非常好! 就算唔高分, 都值得一讚!~

至於cambridge 就真係要有咁上下實力, 做更多準備功夫先可以應付到考試~ 預計只會考starter,因為真係無咁多時間考咁多野( 雖然有啲人真係可以在面試前考埋mover), 自己知道寶品係幾鐘意英文, 應該可以應付到, 亦當係幫助佢提升英語能力, 就算最後張cert用唔著, 小朋友都絶對學到唔少野~ 最梗要家長唔好俾壓力小朋友, 咁小朋友都唔會太抗拒考cert 應試~

遲吓再分享多d啦~

學游水

近2日天氣涼返好多, 又要同夏天講byebye喇!!~

夏天几乎10個有9個家長朋友都會俾小朋友學游水~ 消暑之餘, 當做吓運動同埋游水係真係要識既~ 上年寶品3歲半, 我見佢好鐘意去泳池玩水, 就早啲俾佢習泳啦~ 點知到真係學時, 就唔鐘意+ 有啲怕水 + 怕辛苦..... 上年夏天學咗4個月, 天氣凍就決定停學, 反正佢都唔太鐘意, 1對1上堂學費又貴~

今年搵咗寶品的好朋友包包一齊學游水, 有個伴確係好啲! 有比較就會有動力, 而且有伴係會游得開心啲, 覺得自己唔係孤軍作戰~ 雖然寶品表現都唔算好, 仲係驚水, 態度都未夠積極.....不過都叫做慢慢進步緊~ 頭幾堂非常扭拎, 依加叫做接受咗上游水堂~ 今個夏天, 暫時上咗8堂, 未學識, 只係做到踢板自己游, 仲係唔太願意全個頭伸哂入水中~ 因為佢之前玩水試過少少浸親, 所以嚇怕咗, 依加唯有等佢慢慢接受同適應, 總有一天大個仔啲會唔驚水掛?

依加都唔敢停學, 好怕會好似上年咁, 一停就會無咗個水感, 出年又要由頭嚟過重新接受..... 所以都係堅持學埋落去, 凍啲都頂吓~ 雖然會所冬天會有暖水, 但天氣凍阿媽我自己都唔想落水游la...小朋友都幾慘....真係要買d野食鼓勵讚賞吓佢哋先得! 

寶品唔鐘意習泳, 但係去沙灘or泳池玩水呢, 佢又超級鐘意ga喎~ 絶對係一個陽光男孩, 唔怕曬, 唔怕污糟~ 唔怕咸! 佢阿媽我其實唔想佢曬得太黑, 成個賓仔咁又好難白得返! 不過夏天真係好熱, 最想游水, 所以有時間都會帶佢去游水俾佢忘我咁玩吓輕鬆吓~ 

早前我哋一家去馬灣游水, 啲水污糟到呢.....而且腳下的都唔係沙, 係石!! 勁 "吉" 腳! 不過寶品一於少理, 照玩! 仲玩到唔想走~

去長沙的沙灘就正好多~ 啲沙滑滑的, 而且仲摸到好多蜆! 好好玩~

超級愛水泡的寶品, 只要游水有得用水泡佢就會勁開心! 

迪士尼新酒店的泳池, 人多到呢.....我哋似浸水多過游水! 

會所pool side party, 非常enjoy~

朋友呃寶品水底裡面有thomas火車..... 個傻豬仔真係信! 哈哈! 但又無勇氣伸個頭落水睇!