買單車

今年聖誕節正日, 瞓醒阿囝係無禮物收~ 我已經提過佢幾次, 如果想要禮物, 就要自己寫信俾聖誕老人~ 每次在街上佢都話回家寫, 但最後都無咗件事~ 可能因為佢懶, 亦可能佢真係無乜所求? 唔理啦, 佢自己都唔著緊, 咁就唔好要聖誕老人的禮物喇~

今年鄧生講過面完試會買單車俾囝, 咁就當聖誕禮物啦~ 繼續"貴野留俾daddy 買"~ haha

 聖誕正日中午得閒, 就一齊去揀單車~ 之前有去反斗城睇過, 但款式比較少, 去單車鋪多d選擇, 又可以試坐, 同埋問老闆專業意見~

元朗都有幾間單車鋪, 我哋是但去間近近哋的望吓先~  

囝見到咁多單車, 好開心啊, 又即刻睇中架Thomas..... =.="

大個仔喇, 梗係唔會俾佢揀哩啲小童單車, 我哋既target係中童單車~

哩部係16吋呔, 老闆話囝的身高, 最少要買16吋~ 

再試埋18吋呔~ 其實仔都玩到, 老闆話哩部可以踩到12-13歲! 

咁就梗係買部可以玩多幾年ga la~ 囝試完都好鐘意~

本來我係諗住買部綠色, 但現貨唔多, 而且只有黃and藍色, 問囝意見, 佢話想揀黃色~ 

見到佢勁心急想擁有, 睇嚟都係等唔到去第2間鋪再睇ga喇~

於是我哋就決定照佢意思, 買黃色~

原價$1250, 講價後都要$1200~ 包1年保養~

比我哋預期中貴! 我以為幾舊水就買到架輔助碌單車ga ma~

之後上網search, 見同牌子同吋數都係差唔多價錢, 估計無被搵笨, 應該鋼水同呔都唔錯, 所以貴少少~

同區買單車的好處就係可以直接踩返屋企~

雖然鄧生平時對阿囝又嚴厲又高要求, 不過凡係對囝好的, 有幫助的, 佢都好捨得買野同埋上堂~ 用好多方法去教哩個問題多多的百厭仔~ 依加中英文默書串字都交哂俾鄧生教, 真係做哂衰人~ 囝可能大啲先會明白daddy的用心良苦~ 現在協助你建立的一切, 都真係為你好~

聖誕約埋班同學仔開party~ 都有帶埋單車去踩~ 

已經有幾個同學仔識得踩2碌單車喇~ 

寶品似乎仲要一段時間先可以拆輔助碌~ 不過都唔緊要, 踩單車應該一定可以學識的, 唔想迫佢~ 最梗要佢開心, 鐘意踩~ 等有一日佢覺得拆碌可踩得快d, 就自然會向我哋要求拆碌~ 

如果出年聖誕識得踩, 我已經心滿意足喇~ ^^"

妹妹好鐘意朋友仔的BB 3輪車仔~ 其實屋企部scooter都可以咁玩, 得閒摷返出嚟俾妹妹玩吓先~

可愛的妹妹豬~ 有街去就開心~