來自日本的種子

話說上年在大阪京都, 路過一間賣園藝用品的店, 門口有2大個種子架~ 好吸睛!

於是就去買D種子, 帶返HK試吓種~ 

我哋揀咗車厘茄&花生~ 種完可以食~ haha

其實我都無乜時間照顧啲植物, 交在我手都幾難種出果實.....所以我交俾種野專家 - 我阿媽!

婆婆教寶品放泥同埋落種子, 之後就交比婆婆打理~ 寶品好得閒時先會去公園探吓佢哋~

車厘茄好快種咗出嚟, 但早幾個月面試太忙, 都無時間嚟睇吓~

依加得閒D, 婆婆就叫寶品快D去採花生, 因為應該成熟哂喇~

花生又名土豆, 係生於泥土裡面~ 採時要在泥裡摷吓挖掘吓~ 

真係種出花生來~

婆婆話唔知種唔種得成, 所以只係落咗一半種子~ 所以收成唔算好多, 大概有2-30粒~

寶品拎去婆婆屋企用水煮嚟食~ 佢哋話好好味, 每粒都好飽滿~

囝一向好鐘意食nuts, 花生係其中一種好喜歡吃的~ 

下次去日本, 不妨買啲種子返嚟種吓~ 小朋友見到成果真係幾開心ga~

而且日本的品種應該會有保證d, 種出嚟都靚d~

不過地方有限, 我都係會揀啲唔需要太花地方去種稙的蔬果~

如果下次種盆士多啤梨, 唔知成唔成功呢? ^^"

兒童驗眼

自4歲後, 我哋都有帶囝去兒童眼科驗眼睛~ 時間過得好快, 真係眨吓眼又到期驗眼~

K1 - 第1次驗眼, 竟然話囝左眼有150度散光, 完全無諗過....>.< 視光師話可以再等多半年, 如果再加深就要戴眼鏡~ 話佢仲細, 眼球仲發育緊, 仲有機會變~ 叫我俾佢去多D大自然睇多D遠野, 同埋唔好太早寫字or 讀書太用神..... 反正仔都唔鐘意寫野畫野, 我就尤得佢hea吓唔駛咁早學寫字~ 另一方面就全面禁止佢睇手機/ipad~

K2 - 半年後, 返去再驗眼~ 話囝散光減咗50度, 依加變咗100度~ 原來度數真係有機會減ga! 好開心~ 亦反映出, 少啲睇手機, 對雙眼既影響係細d~ 之後可以隔耐d, 1年後才返去驗眼~

K3 - 1年多d, 又返去驗眼, 散光再減多50度, 今次左眼散光得番50度, 右眼得無散光! 非常之意外! 因為上年係非常辛苦的一年, 為面試上齊哂中英數補習班, 又成日同佢溫習、學寫字、又偷雞俾佢玩ipad做重組句子之類的練習.....未去驗眼前, 我仲同鄧生講今次實要戴眼鏡啦! 所以真係無諗過散光無增反而減咗! 真係要好好keep住!

驗眼費用$400, 好詳細又好全面~ 服務同埋態度都好好~ (全自費, 非賣廣告)

囝仲未知道保護眼睛的重要性, 仍然係好餓玩手機~ 雖然hk大部份學生都戴眼鏡, 但都唔想佢近視/散光太早加深, 會帶來其他生活上的不方便~ 都係越遲戴眼鏡越好啦~ 為咗佢好, 繼續盡量少d俾佢玩電子產品~

去開荃灣, 就帶仔去D park 逛吓新開的Donut Village~ 裡面最吸睛的, 一定係哩架黃巴士~ 有靚靚冬甩雪糕賣~ 味道唔會太有驚喜, 但小朋友見到咁靚咁大杯, 多數都會好開心!

做D park會員, 1月份可以試玩Donut farm~ 唔駛錢玩30mins~ 

先填色~

填完色拎比工作人員scan, 咁自己的作品就會在screen出現, 走來走去~

仲有個扮種菜的位置~ 其實囝已經就快6歲, 但係佢仲係好鐘意玩煮飯仔, 扮職業哩啲玩意~

當日回程時都天黑lu~ 囝都攰到瞓著咗~ 咁又過咗一個忙碌的星期六~

又嚟大棠冰雪館~

元朗大棠好似每年冬天都有冰雪館可以睇冰雕~

我哋唔係年年去, 不過都去過3年~ 因為近近哋可以俾囝體驗吓冰冷感覺~ 玩吓冰滑梯, 又睇吓冰雕~ 每年我都好驚個囝會凍親, 所以每年我都會帶私伙冷帽、頸巾、羽絨俾仔著(私伙穿裡面, 外面再加冰館提供的羽絨) ~ 佢係會暖好多ga~

2014

當時未夠2歲, 我諗阿囝已經唔記得哂~

2017

4歲幾, 應該有啲印象了~ 仲可以自己玩冰滑梯~

2019

5歲幾, 就快6歲了~ 今次影相非常合作, 影咗好多相呀~

大個仔, 自己玩水泡冰滑梯~ 佢話勁好玩~ 同朋友仔們玩咗好多次~

有得玩真係唔怕凍又唔怕攰ga~

玩得好開心~ 

其實囝未去過滑雪, 我覺得佢會好鐘意玩雪橇~ 

之後四圍影吓恐龍 (我覺得啲恐龍好似係reuse YOHO MALL之前的恐龍佈置)

又玩咗2轉彈床~

就快6歲了, 仲係咁鐘意波波池......^^"  因為太晏去到, 四輪車收咗檔, 無得玩~

今次1家3口入場連代幣大概洗咗$600, 泊車$80~ 其實都唔算好抵玩~ 不過1年1次, ok la~ 最梗要有伴玩就開心~ 上次我哋自己帶佢嚟, 全個彈床得佢一個人, 佢又係彈2吓就唔玩喇~

冰館高過70cm就要收費, 好唔抵~ 加上覺得妹妹今年都係未適合入去, 所以出年再帶妹妹嚟啦~

晚上接咗阿妹出嚟食飯, 有得去街佢就開心~

最近話動物餅好唔健康~ 不過哩啲係之前買落, 都食埋先唔好浪費~^^" 間中食少少無事掛? 以後買少d~ 

北河同行

上星期透過"自然遊樂" 參加咗"北河同行"的義工派飯工作~ 即係支持深水埗明哥派飯俾露宿者同埋老人家~ 雖然義工都要每人俾$150 (大小同價, 早報名有9折), 此費用扣除經費後其餘係支持明哥作派飯用途~ 當係做少少善事我覺得OK~ 

另一個目的係想俾仔睇吓民間疾苦, 未做哩件事之前, 佢真係唔知乜野叫"露宿者", 唔知道原來HK係有人無屋住無飯食! 

囝同理心比較薄弱, 唔算好識關顧別人感受~ 我覺得好大部份係天生, 妹妹明顯比哥哥識睇人眉頭眼額, 知道人哋感受~ 見人喊會即刻拎紙巾去幫人抹眼淚~ 先天不足, 後天想建立都需要時間~ 慢慢嚟~ 除咗多講故事, 亦想多D帶哥哥去做吓義工~ 

 回家後, 我有再深入啲解釋派飯的意義, 點解露宿者需要飯盒... 如果一個人無哂錢, 係會遇到咩野困難? 強調俾佢知, 佢真係好幸福, 要好好珍惜! 唔好成日食剩哂啲飯餸~

派飯活動5pm-7pm, 一齊行去天橋底排隊派飯, 全程都係企~

當日我哋7:30起身出發去油麻地上堂, 上哂堂後又去商場玩咗2小時, 所以黃昏去到深水埗時, 寶品已經開始打哂喊露~ 我都知佢好攰好眼瞓, 下次真係唔可以咁cher~

今次係約埋好朋友包包一齊去, 有伴高興d~

派飯前有得試味~ 不過寶品食完下午茶無耐, 所以都無意欲試食~ 攪攪陣~

每位長者/露宿者可以得到一個飯盒+水果+水+福袋~

好不容易, 終於完成哂任務~ 寶品極之疲累, 成日扭我抱, 要又tum又鬧~ 

佢仲跌咗生果落地2次 >.<~ 真係好唔專心! 

btw, 都可以體諒佢真係好攰~ 下次會安排得好d~

鼓勵狀~

當日未派飯前, 有2hrs空閒, 我哋去咗蘋果商場打機~ 

個場幾舊吓, 有啲雜~ 不過有家長陪住玩都OK既~ 都係玩啲舊式兒童遊戲game~ 不過價錢就比冒險樂園平好多~ 唱100蚊已經夠佢哋2個玩1個鐘喇~

深水埗好似無論早上定晚上, 都係咁多人~ 係有少少雜, 不過俾小朋友親身體驗吓每個社區的不同, 都係好事呀~ 去過先會體會深刻D~

2019展望

2018年過去, 今年經歷咗小一面試, 同阿囝一齊面對咗好多挑戰, 經歷咗前所未有的忙碌, 從未試過如此倒水式的洗錢報班上堂學野~ 真係為面試, 去到盡!  當中有起有跌, 有笑有淚, 全部都令我畢生難忘, 亦獲益良多~ 最終我哋都得到最想要的禮物, 都算係豐收的一年~ 好滿足喇~  

新的一年, 只期望輕鬆d咁過~ 無太多憂慮, 2個囝囡順利適應新學校生活就好了~

 另外突然諗起有樣野一直仲未成功, 都想當係2019年的小目標~

就係游水喇!

2017年10月, 我寫過一篇blog係關於阿囝學游水~

14個月過去, 阿囝仍然未學試第1式 (自由式)~

無可否認, 我哋練水的時間極少, 只靠每星期一堂泳課, 而且仲時常因為唔得閒/ 病咗而缺課~

但最最最大原因, 係寶品太怕水~ 佢足足用咗1年時間去克服心理障礙, 2-3個月前, 終於肯成個人連頭潛哂落水! 看似非常輕易就做到的事, 我哋卻要花好多時間去做! 有一段日子, 我哋經常在浴缸開一大缸水, 鼓勵同埋迫佢嘗試~ 初初幾次都係流哂眼淚喊哂ga~ 成日話驚.....但迫迫吓, 就成功咗! 可以連續潛上潛落好多下~ 

游水老師唔主張強迫小朋友, 驚有反效果~ 但我哋好知道自己小朋友的性格, 如果唔迫佢接受, 可能再學多1年佢都係唔肯潛個頭落水ga~ 咁等法, 不如我哋試吓幫吓佢去克服~

好啦~ 難關衝破咗~ 最近幾堂開始有進步了! 有一次老師仲話佢進步得好快, 直頭係躍升咗3級! 我哋倆公婆聽到當然係好開心! 係咁讚阿囝, 又請佢食野~

當我哋以為一切都會好順利時, 對上一堂, 又出現其他問題! 話說囝以往未識潛水時, 多都係做啲踢板動作, 或在池邊練潛水~ 依加佢唔怕潛水, 老師就梗係叫佢學習邊潛邊向前踢腳~ 當仔潛水時, 佢話望見水底D黑色(係瓷磚) 好驚喎!! 堅持每去到深色位都唔潛落去, 白色先肯潛!

就係哩啲花lee 碌的水底地磚.....

真係O哂咀......點解佢會細膽得咁梗要?

要克服的始終都要克服! 唔想轉場遷就佢! 而且根本都唔係黑色, 只係深藍色.... 有咁可怕嗎? 

暫時都係想佢試吓克服, 除咗解釋、鼓勵, 都無乜其他辦法喇~

鄧生成日話唔介意阿囝好耐都未學識游水, 因為人人的進度唔一樣, 終有一日實會學識~ 閒時學水咪當做運動~ 但我每次學水見到阿囝唔認真唔專心學, 我就會睇到眼火爆.......依加仲要處理佢啲心理障礙!

不過真心講, 學唔識游水其實都唔係咁大件事啫? 我係應該要放開D去睇哩件事~

2019年, 小小願望~ 希望囝學識自由式, 當係對父母老師有個交代~ 真係成日兩公婆飯都未食走出走入陪佢去學水, 仲要俾學費~ 希望仔真係俾啲心機去嘗試~ 達成媽咪哩個小小願望~ 

2018聖誕

今個12月節目多籮籮, 無停過玩+學野, 充實到不得了! 經常keep住holiday mood, 玩到個心都散哂~ 放埋元旦假後, 大人細路先慢慢收捨心情返工返學~

回一回帶, 記錄吓啲精華~

聖誕前學校報佳音~ 因為K3了, 而我又知道升讀的小學唔係宗教學校, 以後無乜機會再睇到阿囝報佳音, 所以今年我請咗假, 去學校睇, 影多D靚相~ 

唱咗好多首歌~ 小朋友唱詩歌真係好可愛又動聽! 仲好感動啊~

長假期前, 係學校表演+party活動~ 囝好期待哩日,可以又食又玩~

雖然只係啲簡單的食物, 不過寶品都好開心, 仲食咗好多火雞肉!

今次阿囝有個幾分鐘的英文表演~ 見到佢在台上有啲緊張, 雖然表現唔算滿分, 不過係佢既第1次, 已經做得不錯了! 亦感謝老師俾佢演出既機會~ 成日都覺得阿囝算係難control的小朋友, 所以好少被老師揀去做表演, 所以真係要多謝老師~

平安夜當日我都要返半日工, 之後約咗朋友食飯短聚~ 咁啱當日係寶品公公生日, 就俾咗啲SKY100的free tickets 公公婆婆帶寶品去逛吓~

不過勤力的公公在如此特別的日子, 都堅持要返工, 所以最後得婆婆帶佢去~ 

寶品都有寫咗張生日咭送俾公公~

去極唔厭的SKY100......haha~ 今年已經係第3次上嚟~

不過婆婆第1次上去, 當陪吓婆婆, 拍吓拖都好~

晚上寶品仲走2場tim~ 先跟公公婆婆去流浮山食飯慶生, 再返屋企party~

今年在我們家攪party, 我特登買咗張可摺的長枱, 方便擺放食物~  

今年突然叫啲小朋友玩天才表演, 佢哋一聽到有禮物, 即刻勁落力去表現自己! 笑到我標眼水~ 過多2年可能佢哋都顧住打機唔蘇我哋lu~ 天真的時光有限, 我會好好記住你哋現在可愛攪笑的一面~ ^^

聖誕正日, 買完單車去咗朋友屋企party~

妹妹有同歲數的小朋友陪玩陪食, 都好開心~ 

Boxing Day 繼續去同學屋企party~

早上囝陪我出荃灣拎mini cupcake~ 

見賣點係健康食材, 無人造色素, 所以買咗2盆去party分享~

同學仔屋企有好多槍~ 寶品係無玩過類似的槍類玩具, 新嘗試~

今年聖誕揀咗去逸東酒店的"普慶"食聖誕buffet~ 今年全新裝修, 環境闊落, 食物種類都好多~ 生蠔龍蝦燒烤刺身....全部供應充足, 唔駛搶食~ 質素都幾好, 朋友果然無介紹錯~

不過寶品真係食勁少野, 唔抵~ 而妹妹因為去完party瞓咗覺, 又未識食野, 所以無帶妹妹去~

紅日過後, 繼續請假陪吓囝囡~

未去過人氣爆燈的屯門公園, 膽粗粗試吓去玩吓~

真係超~~~~ 多人! 人多根本唔好玩~

哥哥愛玩沙~ 妹妹相反~

不過啲沙好細滑, 而且拍幾拍就甩, 唔錯~

最開心最瘋狂的環節.....玩水!

我已帶定衫褲同鞋俾佢哋換~ 不過始終冬天, 唔敢玩太耐~ 見衫太濕我就迫佢哋收隊喇~

妹妹都唔執輪, 玩埋一份~

除夕前, 繼續有party~ 帶埋囝去朋友屋企BBQ~ 朋友間新屋夠大, 開party好方便~

大人天寒地凍BBQ傾謁, 幾個小朋友就在屋內睇DVD, 好happy~

除夕繼續搵節目~ 去近排好hit的周伯農莊摘吓生菜, 親親大自然~  

超大的羅馬生菜~

可能因為太hit, 有一半生菜田都被摘光了~ 

$40可摘滿一袋~ 價錢都唔算貴~ 仲幾好味tim! 煮熟後仍然爽甜~

摘完菜回家同朋友仔玩一陣就去玩冰雪世界同埋食TEA~

YOHO mall新開咗間窩夫店, 幾好味喎!

元旦日, 表哥仔開生日會~ 眨吓眼就6歲!

妹妹終於肯食街外野! 不過都係貪玩試咗少少咋~ 

1月3日要收捨心情返工返學~ 興幸阿囝間學校係無乜假期功課, 所以佢真係可以玩足10日!

今年聖誕好開心好充實, 但願每一年都一齊開心平安健康過聖誕, 就心滿意足了~ ^^