學功夫

身邊好多朋友的囝囝都有學跆拳道~ 要在自己住的區學習亦不是難事~ 不過我自己對跆拳認識不深, 自己偏向鐘意中國武術多D~ 不過去邊度學好呢? 大會堂啲course 又好似流流哋...... 其實鄧生一向有學開詠春, 不如簡單啲跟daddy一齊去學吓體驗吓啦? 一來正宗, 二來拜師都容易d! 於是最近就開始咗學習詠春喇~ 

同場都有好多小學生哥哥~ 不過始終寶品4歲幾都係太細, 師父話慢慢嚟, 少少咁學~ 因為太細個專注力唔夠, 好多招式都難以掌握~ 無期望無壓力~ 就hea住咁跟daddy每個星期去體驗吓, 順便當做運動la~

我覺得玩中國武術舞刀弄槍幾有台型ga~ 遲啲睇吓有冇時間同機會又俾囝試吓la~ 

而詠春都唔係齋打, 都有刀有棍~ 不過小朋友有排都未做到灑刀棍的層次~ 所以慢慢嚟la~

希望學習每一樣運動都可以強身健體之餘, 亦練埋專注力~ 

寶品的專注力較差, 而且無乜耐性, 對佢學業學習其實係有一定阻礙, 所以最近都尋求緊方法幫佢改善專注問題~

係咪男孩子都係鐘意玩打交ga呢? 可以練出拳, 佢覺得好過癮, 笑得好開心~ 當玩......

在職媽媽真係無時間陪仔每日做運動去公園.....每晚放工回家已經8點, 天都黑哂, 所以閒日絶少陪仔做運動~ 放假又顧住學野或去街.....令阿囝太少機會跑跑跳跳做帶氧運動! 

 所以冬天我都唔敢停學游水, 想阿囝keep住有運動, 同埋學識游泳哩樣求生技能! (暫時學咗10堂, 仲未學識)  

現今好多小朋友的生活都超級忙碌~ 最近學多咗野都已經忙到我哋頭都暈! 真心佩服年紀少少就開始學樂器的小朋友~ 學習樂器真係需要付出好多時間同埋耐性去練習~ 所以我都唔敢安排樂器俾寶品, 因佢啲時間已經好唔夠用, 等待有一日, 佢主動跟我講想學樂器, 我先俾佢試~ 我認為小學先開始學都未遲, 最重要係有興趣有動力~

HK都有得摘提子

在HK可以摘的水果通常都係士多啤梨~ 最近發現原來元朗大棠有得摘提子喎! 仲要係寶品好鐘意的青提~ 咁近梗係喳車去八吓試吓摘~^^"

地址: http://www.yl.hk/lpsb/

閒日下午嚟到, 係無乜人既~ 不過提子就比我預期中細粒~ 一場嚟到, 都照摘啲嚟試吓la~

品種寫住係香印, $150/磅!

 不過水準呢, 我覺得同日本的差好遠~ 但係都甜的~ 只係唔算超甜同埋貴啫~ 嚟得玩採摘都預咗被"略"~

好快摘完埋單lu~ 盛惠$170~

隔離仲有巨鋒摘ga~ 平d~ $80/磅~

camper van之旅

相信有睇開PEPPA PIG的小朋友, 都會睇過PEPPA坐camper van去Holiday~

知道hk有得住時, 我哋年頭體驗過大嶼山海迎灘的camper van之旅, 在海邊幾有渡假feel~ 不過位置實在係唔太方便, 又不能自己喳車入去(要禁區紙)~ 幾轉折先入到去~

最近見天水圍都有camper van住喎! 就在嘉湖山莊隔離, 可以喳車去仲包埋泊過夜, 咁方便, 又滿足吓個囝, 去玩番2日1夜~ 4人家庭車, 星期六日假期要2千幾一晚,都幾貴! 所以我哋揀星期五+六, 連埋燒烤包都係$1600, 我覺得價錢都acceptable~

相關網頁: http://www.minglefarm.com/ebooking.html

當日5點我哋到咗營地~ 果度有好多唔同車款, 仲有吹氣酒店住~ 不過就無見到有人住喎, 始終感覺無乜安全感, 而且吹氣屋無洗手間都唔係咁方便~

好大片草地比小朋友放電~

車廂內~ 唯一一樣野唔好, 就係電視係signal弱, 收唔到TVB, 又無野啱睇~

另外一邊sofa都可以變床~

等埋朋友仔, 齊人就bbq~ 其實唔bbq都無餐廳食野, 所以秋冬嚟住比較合適~

燒烤包唔算好貴, 但幾豐富又好味~ 意料之外~

小朋友們就汽水零食放題係咁食, 爽YY~

之後佢哋不停上上落落架車, 又在車上玩啲高難度動作, 乜都玩一餐~ 佢哋好happy呀~ 不過爸媽們都好勞氣, 成日要提醒管教佢哋.....

自己喳車去的, 可以帶埋單車, balance bike去踩~

不過當晚我哋3個人迫埋一張床, 都好迫吓, 瞓得唔係太好....Zzzzz...不過一晚半晚無所謂la~

第2朝起身, 我刷緊牙, 寶品在梳化上望出去(當時無影相, 情景大概如下圖), 佢自己無端端唸詩: 春眠不覺曉, 處處聞蹄鳥......認真mode唸哂成首詩出嚟~ 突然才子上身, 非常攪笑~ 

食少少野後, 又繼續玩多一陣, 11點先走~ 

營地都有啲玩具借比小朋友玩~ 又有球類運動用品~

 

總括嚟講今次秋天住camper van好舒服又幾寫意~ 希望等妹妹大啲又試吓住~hehe

2nd水晶巴士遊

今年年中, 寶品同好朋友包包一齊坐過1次水晶巴士, 令寶品念念不忘~  每次在尖沙咀街上見到水晶巴士,佢 都會好緊張咁叫我睇吓~  

見fb有買3送1優惠, 而且鄧生同埋朋友仔仔都未坐過, 就約埋再坐一次喇~  因為係舊客戶, 所以水晶巴士都俾咗discount我哋, 最後1家3人$900有找, 包每人一個點心餐(連飲品+甜品)~ 上到車仲買埋架玩具水晶巴士($98)~  其實都幾高消費, 不過開心無價, 今次係daddy俾錢, 難得佢肯試, 就一齊坐吓! 因為鄧生每日都要搭個幾鐘頭巴士返工, 所以佢話對坐巴士無乜興趣, 但未試過就陪阿囝一次~ 應該唔會再有第2次, 除非超級減價~^^”

水晶巴士有2條路線~ 上次試咗去中環碼頭(摩天輪), 今次試吓去青嶼幹線觀景台! 反正我哋都去未過~

不過可能因為當日落雨塞車阻咗啲時間, 所以落車去觀景台的時間只有15mins! 講真小朋友去完廁所, 得番唔夠10mins上觀景台, 係超級趕! 我哋拿拿聲行上去, 然後影吓相就要走了~ 觀景台好似有間shop展示火車玩具的, 今次都無緣閒逛了~ 

當日落咗好耐雨, 好彩我哋落車時又停咗雨, 可以影吓相~

見到阿囝咁開心, 真係覺得此刻無價~~ 其實啲點心話係米芝年點心, 味道都唔錯ga~ 不過得1款餐~ 如果有多啲款式, 有啲新意先會令客人有意欲搭多幾次ga ma~

特別版玩具水晶巴士~ 唔差在, 滿足埋小車迷~

考cert, 朗誦比賽

再考多1次Trinity GESE grade1, 今次真係有Distinction呀! 好開心! 因為知道grade 1應該唔算難, 基本對答, 自己覺得阿囝應該可以答到哂, 多數係衰大意, 所以想試多一次~ 果然有一次經驗下, 成績係有進步~ 難怪咁多人都話, 報cambridge起碼報2次, 因為卷有深淺, 唔好彩撞正當日有一題半題tricky問題, 就已經可以少咗一個盾ga喇~ 

寶品K1開始學普通話(每星期1堂), 主要係為小一普教中同埋面試打底,  萬一面試時真係用普通話問, 都唔會被問到口啞啞~ 雖然我個人係鐘意粵教中, 可惜好多學校唔係咁諗吖嘛! 直私小大多用普教, 大抽獎的津校亦唔到我揀, 到時派到乜教中都要照讀ga la~ 

好彩阿囝都無抗拒學普通話, GAPSK初級都拎到唔錯的成績~ 而眾多的面試講座, 都教家長要俾小朋友多啲去參加比賽~ 增強自信心同埋見吓大場面~ 我覺得寶品運動唔叻, 語言天份都OK, 所以就揀朗誦比賽~ 而且普通話老師都話, 每堂抽少少時間教朗誦仲會無咁悶tim~

就係咁, 寶品8月份時體驗咗佢人生第1個比賽~ 第1次乜都唔知又無見慣哩啲場面, 都無期望過會有咩獎項~ 出場後因為太緊張, 寶品完全忘記要做動作, 仲要硬boun boun咁目無表情..... 最後如預期一樣, 得到豬肉獎一個~ haha 

有塊安慰金牌囝已經超開心, 以為自己好叻.......我哋話, 想好似其他人咁有獎盃, 就要做得更好, 唸得最好果啲小朋友先會有獎盃ga~

3個月後, 又挑戰朗誦比賽~ 今次主題係狀元盃, 所以得獎的小朋友係會有狀元帽送ga! 感覺上真係威水d~ 寶品唔算發揮到最好水準, 我自己覺得可以做得更好, 不過都唸完了, 唯有下次再做好d la~ 等待結果時我真係好緊張, 因為知道寶品好想試吓拎獎盃既滋味~ 而我又覺得佢既水平好似未足以拎3甲, 所以有啲擔心今次會令佢失望~ 最後結果係拎季軍! 已經令佢非常極之開心! 佢出去拎獎時高舉獎盃, 大聲同我講話今次有獎盃拎俾公公婆婆睇喇! 又好笑又感動! 

因為上次體驗過朗誦比賽之後, 發覺有好多小朋友都好勁! 大家都係有準備而來~ 我哋真係唔可以抱玩玩吓的心態, 靠運氣去應戰ga! 所以今次我哋都比上一次積極, 都有陪仔練多啲, 又成日提點佢邊度做得唔夠好, 一齊為比賽而準備~ 我自己都知道佢水平未夠, 無乜可能拎冠軍, 但今次有第3名, 都幾好吖~ 有盃之餘, 又俾到佢一個進步的空間~ 努力向更高的名次進發!

又考試

星期日, 再考多次Trinity GESE grade 1, 一來想拎多啲面對陌生人對答的經驗, 當係面試練習, 二來有感寶品資質唔算差, 尤其在英文方面, 覺得佢上次可能係失手, 所以想俾多次機會佢去試吓取更高分~   

有得去考試佢不知幾開心, 因為代表又可以搭港鐵過海!

"怕羞"哩2個字真係唔會在寶品的字典裡出現......佢根本當去玩咁, 未入考試室前已經在外面同其他唔識的人係咁玩同講野, 又多手走去開人哋部電視機.....之後笑住入去, 我聽到佢好開心咁講Hello~ Good morning~

5mins後已經完成考試, 佢出嚟第1句說話係同我講: 今次會有A ga喇~

旁邊啲人唔知情的, 實會以為我好怪獸, 比好大壓力個囝! haha~ 事實係寶品真係當入去吹吓水就走, 我反而希望佢態度上可以認真d, 知道考試係要定定的.....

完成後例牌要搭吓南港島綫滿足吓大少~ 因為平時係好少機會搭~ 

反正過咗海, 24孝媽咪又順便去埋香港公園玩咗2個鐘~ 

好想假日盡量安排機會俾囝輕鬆吓~ 讓腦袋好好放空~ 

寶品好喜歡香港公園, 因為這裡的playground 夠多, 滑梯千秋沙池....玩到唔捨得走~

大家都好攰, 所以搭巴士返元朗~ 有得坐吓瞓吓~

落車在天橋買的~ 寶品叫哩啲做"鬍鬚糖"~ haha~ 不過佢覺得好痴牙, 麻麻哋鐘意咋~

驗眼仔

小朋友足4歲後, 應該去做一次全面的眼科檢查, 確保知道視力無問題, 以免遲咗戴眼鏡而對視力造成更大影響~

寶品4歲後我帶佢去兒童眼科(在荃灣) 做過一次檢查, 話佢其中一隻眼有150度散光, 另一隻100度~ 4歲小童嚟講, 算係高, 超過150度就要戴眼鏡.....當時係非常擔心, 不過無乜野可以做到, 視光師話唔想加深得快, 就唔好太用神用眼....多啲去郊外玩, 望遠野, 少啲集中精神睇書寫字.....同埋最好戒玩手機/ 電腦啦~

於是我哋狠心地唔俾佢睇手機, 每次都話佢知, 睇手機會壞眼睛, 想睇youtube就用電視播~ 加上K1下學期我都無要佢寫字, 除咗應付學校少量功課, 其餘時間我都唔駛佢寫字, 結果攪到佢完全唔識寫, K2開學出去學野時, 個個老師都話佢未識寫字.....依加攪到K2前未學寫數字&英文字係好有問題咁 =.="......唉....第時輪到妹妹, 唔通真係要提早寫字去適應哩個世界??

開學2個月, 開始密集式學寫字, 我都擔心佢對眼會有近視or散光加深, 所以係時候去覆診驗眼~

本以為實要戴眼鏡, 點知出奇地, 雙眼的散光都減咗50度喎! 我非常開心! 雖然依加大部份小朋友都要戴眼鏡, 但我梗係希望越遲戴越好~

寶品立體感差少少, 不過都無醫治辦法, 尤得佢長大應該會慢慢變好d~

等候驗眼時有好多玩具玩, 小朋友一定唔會悶~

 答應過佢每次驗完眼, 都會請佢食雪糕~ 所以寶品都唔會抗拒驗眼~ (會路經這間雪糕店)