面試 - 第3間

上星期去石門直資小學面試~

唔想太趕太攰, 所以當日都幫仔請咗假唔返學~

今次in 3: 30, in咗1hr, 出嚟時阿囝明好眼瞓~ 

我追問佢考咗啲乜, 今次佢都講到好多野出嚟~ 因為我話要講我知做咗乜, 我先買零食獎勵佢~ ^^"

佢話有跳舞, 聽指令遊戲, 限時合作砌積木, 中英文認字, 寫名畫畫, 聽故事後吸印仔揀答案.....同埋有著衫環節~ 

未知佢表現好唔好, 不過哩間真係平常心, 無乜壓力~

最近高鐵西九龍站通車, 因為電視都成日講, 所以阿囝期待咗好耐~ 日日倒數住~

知道佢好想坐, 不過最近真係未有閒情上大陸遊山玩水呀! 希望年尾派哂彩後, 可以帶佢搭吓高鐵玩番幾日~

 由柯士甸站行去西九站好方便~ 星期日上完堂有3hrs 空閒時間, 就帶你去行咗個站~ 又順便去吓科學館~
本來想去春水堂買番杯飲品試吓~ 但第1日通車, 站內都好多人, 懶得走嚟走去搵哩間店, 都係下次先喇~

有成年無去科學館喇, 假日好多人, 不過仔都玩得幾開心~ 越大個, handle到既玩意就越多~ 之前太細其實好多野都唔明白又唔識玩呀~

超強勁的山竹

超強颱風來臨前1星期, 基本上office 日日都講住颱風哩個話題, 打工仔講足一星期, 個個都係天文台~ haha~ 其實我個人就好唔想放假打風~ 主要係因為繁忙兒童放假多野學, 要補堂好麻煩, 無得退款又好肉赤!

星期六天氣又曬又熱~ 下午開始掛3號風球, 有啲班無得上~ 星期五晚其實已經買定哂乾糧, 所以無事做就早啲回家補眠~ 一齊大覺瞓足2個幾鐘, 爽! 我真係好耐無瞓過晏覺喇!  

星期日朝早瞓醒, 掛10號風球喇!

寶品覺得新奇又緊張~ 成日望窗睇吓屋外的雨勢~

男孩子對颱風標誌特別感興趣~ 自己寫寫畫畫~

無聊時同daddy一齊整可樂雪條~

打風被困在家, 終於有時間執吓屋! 同埋做啲平時無時間做既事, 例如係砌書架! 

買咗2個新書架但遲遲未有動力砌~ 今次終於砌好咗1個~ 係鄧生砌~

好靚呀!  

其實屋企的書架仔數目可能已經超過10個....好癲! 因為我實在太鐘意買圖書 >.<.....囝越肯睇我就越肯買....結果買到成屋都係書...練習...教材....不過可能就係因為自小在書海中成長, 寶品的閱讀能力真係唔錯, 經常被老師讚佢哩方面能力高~ 其實多多少少都係來自從小伴讀得返來的~ 媽媽我真係有花心機陪佢讀書, 揀書買書~ 

下午大概2點之後吹東南風, 屋外的風雨明顯大咗好多! 山竹真係唔惹少~ 繼而開始有水浸! 好彩無浸入屋咋! 亦感恩住村屋仍然有水有電, 無大影響~ 知道元朗好多地方都停水停電, 帶來好多不便... 打風真係唔係好事, 造成極多破壞, 事後清潔清理又辛苦!

第2朝見到成條街都係垃圾同埋lum樹....  

全港學校停課, 寶品去咗公園搵婆婆~ 其實幾危險, 好彩有俾個頭盔佢戴住~

星期二繼續停課, 上半晝由我湊囝~ 晨早出去奧運補堂, 之後帶佢去買餸~

平時多數跟婆婆去買餸多~ 佢已經記得婆婆去邊檔買豬肉~

 寶品完全唔怕熱, 唔怕臭味, 好enjoy陪我一齊行街市喎~ 我專登每次都交俾佢負責俾錢, 同埋叫佢向檔主講想買啲乜~ 例如$40柳梅~ 佢好樂意做~

適當的生活體驗係需要的~ 除咗想佢貼地啲, 仲想佢自己去體驗超市同街市的不同~ 

每晚埋枱就有餸有飯食, 其實小朋友知唔知道一餐飯從買、洗、煮.....要花幾多時間心機去準備? 多啲帶佢哋去買餸, 就知道單單係幫手抽餸返屋企哩一part 已經唔簡單喇~

小學簡介會

一連2個星期六, 同鄧生一齊聽咗2間真資小學的簡介會~   抽到時間的話我哋都會盡量去聽心水學校的簡介會~ 了解學校多啲,  先可以幫阿囝作出最適合的選擇~

第1間係神校~

雖然被取錄的機會係非常之渺茫~ 但我哋得一個仔, 趁此機會去認識吓神校係點樣都好吖~  之後都唔會再有需要聽了~  聞說簡介會要晨咁早去拎飛 , 我哋覺得無需要咁辛苦去爭聽第1場, 就隨緣試吓拎唔拎到第2場飛~ 當日落雨, 我哋9點半去到好順利拎到第2場飛~ 唔需要排隊, 拎完去附近食個早餐, 11點先返去聽~

神校好唔好人人睇法唔同, 唔在哩度講太多個人想法~ 自己覺得此神校唔係最適合阿囝, 因為好多我哋想要既野, 讀神校都找不到~ 而且想孩子發光發亮, 都未必一定要入神校~ (不過大前題係人哋肯收阿囝再講)


聽完神校去聽吓另一間貼地少少的新派直資~ 位於大圍~

設施同埋學費實在係好吸引! 再聽埋教學理念, 我哋真係幾鐘意呀! 最少我覺得學校有想辦法減輕學生的學習壓力, 另外又有充份的資源去幫助學生, 提升學習能力~



我偏向喜歡happy school, 因為我相信"開心就開腦"~ 孩子讀得唔開心, 就算讀神校都會發揮唔到~ 愉快地學習反而會有無限可能~ 不過真係要龍校先玩得起, 如果要應付呈分試, 真係唔好諗"Happy"~


最近東奔西走去唔同學校, 帶仔搭咗2次東鐵頭等~ 佢非常鐘意, 因為椅子舒適, 同普通車卡好唔同~ 佢問我哋係咪考到哩間學校就可以日日坐頭等返學, 我哋話係! 希望可以令佢努力啲去in哩間學校~ ^^

面試 - YW

8月尾終於完成咗YW 1st in~

今次係寶品第2次小一面試, 又係星期五, 我哋2公婆都請咗假陪佢一齊去~ 雖然無需in家長, 但我哋都唔算in太多間, 揀得既都會認真mode準備, 盡量都一齊去support個囝~

今次時間唔錯~ in朝早11:30, 瞓夠換衫慢慢出門都未遲~ 天氣麻麻(連續落咗2星期雨), 但出門口無落雨, in完亦咁啱無雨~ 都算lucky~  

面試look就係咁~ 簡單斯文~ 有諗過好唔好gel吓個頭呢? 但最後決定唔gel喇~

因為覺得都係自然d好~ 感覺踏實啲! 唔想被老師覺得太貪靚~ 乾淨整齊就夠~

不過我發覺阿囝著白衫會顯得佢膚色好黑~ 下次試吓揀其他顏色的恤衫~  

記得1年前, 我哋先開始真正去研究各直資私校的資料, 當時覺得仲有大把時間, 有排都未考得~ 估唔到真係眨吓眼就到我哋喇! 其實覺得阿囝仲未算ready去in神校, 好多方面都仲有改進空間~ 不過已經盡咗力去準備, 得唔得就睇吓有冇緣份啦~

如傳聞一樣, 要畫自由畫, 睇書, 有幾張大枱問小朋友中,英,數,常識問題咁~

寶品話中英文都無讀生字, 但有讀句子~ 佢話有D D 難~ 無問數學~ 無講故事~ 因為我覺得佢report返嚟既野唔太可信又唔全面~ 私底吓我都同好多朋友家長傾過大家小朋友問咗啲乜~ 聽返來有問國旗、spelling、配詞、普通話歌、數學、交通公具.......around 1小時的面試, 應該問咗唔少野, 簡單啲講係要all round既小朋友~ 適唔適合, 學校自然識揀~ 

聽個囝既口風, 就覺得佢表現應該係普普通通~ 校長話只有10%的小朋友可以入到2nd in, 即係around 500人~ 眾所周知非常難入的小學, 所以唔敢抱期望, 考完慢慢放輕鬆去等待結果~ 就算輸咗都唔代表個囝唔叻, 只係哩個階段未夠人哋叻啫~ 

面試其實我幾擔心撞到熟人, 因為寶品係習慣性見到熟人就特別hyper....結果同組都撞到一位曾經一齊上面試班的同學仔, 但太耐阿囝都唔記得佢個名喇~ 我即刻問囝有冇撩人哋講野, 佢話有.....囝話自己走過去同對方講加油! 真係唔知好嬲定好笑^^"....佢真係好多咀~

完成面試, 又係奬勵時間~ 佢話想食火車壽司, 當然無問題la~

食飽飽又去上暑期班lu~ 今次玩STEM~ 哩個暑假阿囝真係非常充實, 時間表完全被填得滿滿....^^"

嚟緊9月份有2個面試, 真係要快啲收拾心情, 繼續迎接其他挑戰!!

ocean park探索課程

今年Easter假期時, 報咗3日的ocean park探索課程俾囝消磨長假期的時間兼吸取特別的學習experience~ 上次玩得好開心, 3.5hrs的課堂, 有參觀有手工有遊戲有tea time~ 寶品好鐘意, 上完即刻問下次可否再嚟上堂~ 我哋揀咗英語上課, 感覺上寶品應該聽到7-8成~



之後有1次去面試班畫畫, 寶品畫咗海獅館裡面的海獅, 雖然畫功好差, 但老師話佢講得好好, 形容到海獅館裡的不同細節~ 真係學到野返嚟~



於是, 就趁面試之前, summer再報一次OP的探索課程~ 就係想佢有多啲深刻而又開心的學習回憶~ 順便又消磨吓暑假~ 真係排除萬難, 唔怕遠, 唔怕接送辛苦, 唔怕熱咁去完成3日的課程~ 今次試吓中文上課, 始終係母語, 希望佢會吸收得更好~
不過問佢喜歡上中文定英文, 佢答英文~ 原因係佢喜歡某個女導師....並無其他特別原因~

4個月後的寶品~ 今次課堂時間有少少唔同, Day1+ Day2都係每日4hrs, Day3係結業禮~
而今次有得加$488買相片package~ 包3張上課的大照片+1個相片座~ 我哋都照買~
今次有手摸海星同埋海蔘~ 過癮~

上次教整簡單的STEM勞作, 今次教濾水過濾系統~ 寶品都覺得好新鮮好玩~

今次仲有盒4M的濾水學習玩具俾小朋友拎番屋企試玩~ 人人有份, 佢哋都好開心呀~


每次課程的最後1天, 都係家長去睇結業禮, 聽吓小朋友學吓啲乜~ 好簡單, 半小時就禮成~
之後就一家人在OP玩~

今次夏天, 有夏水禮玩~ 我哋都係第1次體驗, 個場好細, 不過對小朋友嚟講, 已經覺得好好玩~ 有水有泡泡, 阿囝真係望到都興奮! 佢不停話好好玩, 令我有衝動想出年再陪佢嚟玩泡! 

我在室內睇實個仔玩水玩泡, 來回咗好幾轉.....小朋友玩水玩泡的地方只for 小童, 家長係企埋一邊睇, 唔準入去玩水的~而鄧生就在出面啲長櫈度等我哋~ 真係小朋友開心消暑, 父母就熱到暈~ 玩完阿囝仲話想去跳彈床! 露天的, 我怕又熱又焗真係會玩到頭暈, 所以無俾佢玩~

以往去ocean park都未去過冰極餐廳, 所以今次上山去試吓~ 

 賣點係可以邊食飯邊睇企鵝, 小朋友們好開心ga~ 如想要近玻璃位係要訂座先有得留~

不過價錢都幾貴~ 當體驗吓, 唔會成日嚟幫襯囉~ ^^" 

玩埋攤位遊戲, 中咗2隻公仔, 勁開心~

星期六請哂假唔學野去玩咗1日, 感覺真係好爽! 好耐都無free 全日喇! 成日帶出帶入學野的日子, 其實真係好苦悶, 唔好話小朋友, 連大人都有啲頂唔順想抖吓氣!