迪士尼酒店-國賓廳

12月初係我生日, 見迪士尼酒店住宿做6折優惠, 就睇吓國賓廳做緊咩價錢, 一家人去住番晚~

 因為一直都好想俾寶品體驗吓"睡衣米奇講早抖"哩個環節, 淨係國賓廳先有~  

我哋需要星期五in, 星期六out, 一查之下, 原來6折後都要4千幾~ 原價係7千幾蚊/晚! 不過鄧生話反正係我生日, 又諗唔到更好的節目, 就豪d請我哋住1次~ yeah!!

我唔知仲會唔會捨得俾錢住第2次, 所以都寫篇blog記錄吓今次的國賓廳體驗~ 大家可以參考吓有咩玩~

國賓廳位於迪士尼酒店7樓, 必須要係住客, 有房匙咭先可以搭到lift上7樓~ 感覺上係招待尚賓的樓層~ 去到7樓check in服務非常貼心, 有枱有櫈坐低等對資料check in, 服務員仲即刻問我哋飲乜, 拎咗2大杯蘋果汁俾我同寶品, 坐在梳化慢慢等~

當日國賓廳的房間都好滿, 好多人, 感覺上國內人多, HK人少....

其實都好快拎到房了~ 臨近聖誕, 房間裡有少少聖誕野送, 拖鞋都有聖誕圖案~

房間size、擺設雖然唔算係好有驚喜, 不過洗手間都夠大, 房間整體感覺亦好乾淨~

國賓廳的房間係一定有露台的~ 露台都好乾淨~

露台個veiw無得頂呀~ 好靚! 加埋藍天白雲同埋清涼的天氣, 真係舒服到唔想走~

本C9當日生日, 有個毛巾蛋糕送, 仲係整埋我英文名的~

我哋有諗過訂唔訂蛋糕, 但記得多年前在哩間酒店訂過一次生日蛋糕, 係極之唔好食.... 一向對酒店的甜品水準有所保留, 都係唔好浪費錢同食物喇~ 去到哩個年紀, 有冇蛋糕俾自己其實我都無所謂了~ ^^"  

活動時間表~ 一連串活動等緊我哋體驗~ 同埋每日4個時段都有食物&飲品供應ga~

不過下午茶同埋宵夜時段供應啲只有曲奇 & 糖果, 大家唔好期望會有好豐富的食物啊~ 但飲品方面就真係唔錯, 又算多選擇, 最鐘意有冷壓果汁~

小朋友一見到糖就開心! 糖果放題.......

晚上的重頭節目就係等睡衣公仔出嚟合照~ 一場嚟到, 絶對唔會錯過哩part!

今次唔係米奇米妮, 係睡衣唐老鴨! 原來係random的, 其實我鐘意米奇多d~^^"

晚上因為國賓廳供應的食物唔多飽肚, 唔可當正餐, 所以我哋去樓下晶荷軒再晚餐, 無睇煙花~ 但聽閒都距離好離吓, 所以應該唔睇都無所謂~

飯後就準時去聽故事~ 有英,普,粵3個section~ 每節都係5-10mins左右, 寶品聽哂三種語言~

晚上回到房間, 驚喜發現有開床服務, 送咗隻睡衣唐老鴨公仔~ 相信係配合番頭先出場的公仔人物~ (床頭都有隻聖誕襪送)

除咗以上的睡衣人物拍照同埋講故事環節, 仲有其他活動俾小朋友玩的~
到酒店的童話天地, 上小小聖誕老人訓練班~ (近聖誕先會有)
平時入童話天地, 非住客係要收費的~ 裡面係堡壘滑梯, 煮飯仔, 玩具, 圖書等等......

聖誕高飛狗會出嚟同大家見面影相~ 工作人員教小朋友唱聖誕歌, 扮聖誕老人笑~ 做吓手工~ 好快就上完堂又有張證書.....

在酒店大堂同聖誕米奇米妮合照~ 如果在樂園內想影哩張相, 都唔知要排幾耐呀!! 酒店影就少人好多快好多~

今次2日1夜都留在酒店, 玩咗幾次不同的小手工~ 都好啱4歲幾的寶品~ 不過如果小朋友年紀再大d, 可能就無咁啱玩, 會覺得太簡單~ 

 平時去住酒店, 我哋都會瞓到好晏先去食早餐, 我今次早咗, 因為要去睇高飛教灑太極! 但鄧生仲瞓緊, 佢可以為咗瞓覺而唔食早餐! ~.~"
揀咗個靚位, 可以邊食邊睇卡通~

高飛灑咗幾分鐘就完lu~

在酒店搭lift時, lift門一開~ 竟然見到Alice在lift內! 真係好奇妙又好有緣呀! 上次Alice陪寶品坐過咖啡杯, 所以寶品對佢印象好深~

第2日玩到中午, 我就要陪哥哥出番市區學野喇>.<~ 妹妹就跟daddy返屋企先~ 

無辦法la~ work hard play hard~ 有啲班係唔方便請假, 就盡量都去上堂~

有得搭迪士尼shuttle bus, 寶品好興奮~

之後轉迪士尼線~ 學完野後, 又陪佢去食火車壽司~  

 雖然話係慶祝我生日, 但其實全部活動都係為哥哥而設~ 成個trip佢最開心啦~ 妹妹就未知發生咩事~ 不過難得仔囡仲細, 仲會陪住我過生日, 就哂佢哋又有咩所謂? 最梗要一家人開開心心~
今年買咗photo pass, 所以生日當天都入園影咗好多全家幅留念~ 今年生日都過得好豐富好快樂呀~

去生日會@元朗448農莊

在元朗的448農莊對我哋嚟講都方便易去, 近過去大棠~ 寶品去過3次了~ 早幾星期, 朋友生日, 原來可以在裡面野餐or bbq 攪慶生的~ 詳情各位打電話去問會清楚d~ 帶去的生日蛋糕, 園內士多會幫忙雪住先~ 448農莊裡有好多不同設施啱小朋友玩, 一定唔會悶~ 家長無需費心思請小丑玩遊戲、請人畫臉、book吹氣彈床.... 在大自然跑跳吸啖新鮮空氣的生日會, 其實都幾好吖~ 

一入園就見到左右2排小花海~ 都幾靚ga~ 我個人建議秋冬去農莊會比較舒服, 我試過6月天時帶寶品嚟, 結果我倆都慘被蚊/蠓咬到手腳臉都花哂......真係太深刻太可怕.....冬天嚟著哂長衫長褲又唔多覺有野咬喎~ 所以我都係支持夏天去playhouse(有冷氣唔會中暑), 冬天去農莊~

半年前~

半年後~

朋友仔5歲生日快樂~

比咗入場費後, 園內爆谷、棉花糖都係任取的~ 任你食~

自從知道離心力的感覺後, 寶品就驚咗玩啲好高既野~ 仍然係唔肯玩哩條長滑梯~

新野~ 寶品好愛玩的吹氣彈床~ 但要另外收費, 好似$30/10mins~

 

仲有佢最愛哩架紅色舊巴士....因為可以玩門! 真係唔明白佢點解咁鐘意玩開門關門....每次都要鬧到口水乾, 叫佢唔好玩隻門, 因為驚會夾到其他小朋友的手! 

指定時間可以餵羊的~ 不過好多人好迫~ 

傻仔寶品竟然試味, 同我講羊仔食的包皮幾好味.....其實啲包皮係好硬吓, 無乜水份, 唔知放咗幾耐, 存放的籃又污糟......>.< 

聽講2018年假日入場票價會加至每位$80 (大小同價)~ 大家留意~

妹妹篇 - 2017

2017年係非常忙碌的一年, 年頭準備妹妹出世, 不停買野、丟野、執屋.....我記得我執到準備入院生b, 都仲執緊屋企啲野.....實係太~~~ 多野>.<! 好多野買完俾2兄妹就堆埋一邊, 未分類未清洗, 仲有哥哥的大量圖書, 買書櫃書架想收拾整齊, 但都需要好多時間去砌去分類擺放.....同埋執野要靠自己親力親為, 因為工人姐姐一定唔知我想點擺點分點收藏~ 都係自己執最合心意~ 

哥哥升咗K2後, 逢星期六我會全日帶哥哥去學野, 一日走3場, 因為有一樣係誇區學, 我哋搭哂巴士、港鐵去滿足哥哥, 真係好攰!! 因為除咗要不停搭車, 佢學野時我仲要在樓下閒逛等待~ 我又會爭取時間去睇吓BB野俾妹妹, 順便行吓街~ 唔想浪費咗啲時間~ 相信每位等接放學的父母都會好明白等候之苦~ 學3場就要等幾粒鐘呀!

而星期日/長假期就多數會安排節目俾哥哥輕鬆吓玩吓~ 總之時間表係長期full哂, 我已經無理會自己係大肚, 照樣陪住哥哥四圍去~ 記得臨生前幾日仲全家去愉景灣掘蛋,玩足全日! 之後果晚個肚抽住少少痛, 嚇得我即刻請多2日假唔返工留家休息兼執吓野~   其實一直支撐住我意志的, 完賴一顆愛子之心! 因為我知道未來一個月要坐月,而且有預感多1個bb要照顧, 真係未必有時間陪哥哥去街, 所以生之前盡量玩到就玩啦~ 加上每次見哥哥去玩都好開心, 體驗唔同事物或多或少又會有得著, 我就更加唔忍心停, 盡我所能陪到底~ 好彩我安排咁多野, 鄧生都無乜"炸瑩", 照陪跟我schedule去玩~ 佢都明白我為咗個囝, 可以去到好盡!

4月底妹妹出世了, 哥哥非常之開心~ 想當年佢係超級呷醋王, 唔比我抱任何bb/小朋友ga~ 估唔到如今佢變咗一個好愛錫妹妹既哥哥~ 可能因為佢見身邊好多朋友仔都有妹妹, 佢又好想擁有一個 la~ 產後好多親友都問哥哥有冇呷醋, 婆婆都會笑住話: 哥哥不知幾鐘意, 日錫夜錫~

初初係咁爭住要試吓幫手餵奶~ 不過依加無哩支歌仔唱lu~ 哩股熱情只係維持咗1個月, 之後就好懶, 好少主動幫手喇~ 

起初時, 哥哥每日放學返來就第1時間搵妹妹, 然後自己拉張櫈仔坐隔離欣賞妹妹瞓覺~ 真係好sweet~ 不過新鮮感過哂後, 又係此情此景不再了~ 哥哥放學嘈少一陣都當幫忙了~~~ 佢把聲大到令妹妹經常瞓唔到! 非常興幸哥哥係返全日制幼稚園, 咁妹妹可以多d時間休息瞓覺~

初初妹妹不停瞓, 見佢咁瞓得我咪唔攪醒佢食奶lor~ 佢又食得勁慢, 成日瞓著覺~ 點知比健康院話過輕, 食得太少~ 於是就餵密d, 之後就脹返了~

去到100日~ 睇番初生的妹妹, 覺得好可愛~ 加依大咗又變咗樣喇~ 

請班好朋友去黃金食Sunday Brunch, 慶妹妹100日~ 已經係7月既事lu~

夏天的黃金海岸酒店可以玩埋水~ 叫哂大家帶定泳衣去, 食飽玩吓水, 幾開心~

7月天氣好熱, 妹妹就慘啲, 陪大家乾煎咗一陣~

無擺百日宴, 因為唔想煩到太多親友太山長水遠嚟飲, 又做禮送禮, 最後我哋都係選擇簡單屋企人一齊食餐飯就得~ 鄧生揀咗尖沙咀阿一~

第2個真係無乜時間又無咁上心, 無再每個月都買蛋糕喇~ 同埋每次都食唔哂亦係另一個我唔想買得太密的理由~
給妹妹的第1個蛋糕, 我揀咗巧虎同小花~ 好靚!!

訂咗海景房食飯, 房間好闊落, 個view都好正~

第4個月, 妹妹就開始厭奶>.<! 經常只飲2-3安, 即刻無咁脹喇....半歲去健康院打針, 話佢體重差少少唔達標, 姑娘話唔食奶就餵固體~ 只可惜固體都食得好差, 用咗成個月去適應, 之後先食得好d~ 以前哥哥都無食野問題, 妹妹食野方面真係難攪好多!

嚟到2018年, 妹妹已經8個月大~ 我的起心肝開個新圍柵俾妹妹用, 希望多啲機會碌吓企吓~
妹妹去街不多, 主要係因為有時好多場合, 好多活動都未適合妹妹去, 帶埋佢去玩好似棧辛苦妹妹~ 瞓得唔好又食得唔好, 所以通常都係返娘家or去啲適舒的活動, 先會帶埋妹妹~

媽媽自問真係太少陪伴妹妹, 多數依賴工人姐姐, 而我哋個姐姐又比較懶....都唔算多陪妹妹玩, 經常放佢落床..... 所以妹妹發展平平, 連坐都未坐得好穩, 我真係心中有愧! 未來哩一年要陪哥哥迎接面試遊戲, 一定會比今年更忙, 但我都會盡力抽身照顧妹妹的需要, 多啲陪伴佢, 希望佢有良好的發展~