上年中秋陪寶品去過童夢城玩, 今年見又有團購喎~ 見中秋翌日唔駛學野, 就陪佢再去童夢城~
$330 包咗整杯麵+整月餅+2個自選職業~ 3hrs內完成, 感覺得幾充實, book好時間唔駛排隊亦幾方便~ 另加1位成人要$160, 所以叫鄧生唔駛嚟, 反正大人入到去都無咩做, 得個等字~
其實童夢城扮職業都hea hea哋, 係咁易做少少task就當完成~ 感覺好似主要係滿足啲家長, 係咁影相~ 同埋可以買返啲靚相~ 寶品話最鐘意整月餅, 又話啲奶皇月餅好好食~ 同埋下次想試做太空人喎~
臨走前梗係唔少得買相環節~ 好似$310/3張~ 我都買咗嚟留念~
回程滿足阿囝, 坐機場巴士~ 第2次坐, 都一樣咁開心~
一個星期後, 我哋又去咗港怡醫院玩"Doctor for a day"~
早前醫院攪咗個問答遊戲, 最快答啱問題的100人可以玩扮醫生, 我哋贏咗, 所以有一個位玩~
鄧生唔得閒, 我又單拖晨早陪仔搭的士出去黃竹坑~ 係好攰, 不過值得的, 因為醫院真係好有心思, 製作仔細認真, 一啲都唔馬虎~ 小朋友可以體驗到好多關於醫生既工作~ 唔駛錢之餘, 仲送咗一大袋禮物, 仲曬埋相俾你留念~ 真係好想可以再玩呀, 就算俾錢玩都唔介意呀~^^" (不過好似唔可以俾錢玩, 因為唔係長期有哩個活動)
婦產科照超聲波, 急救鏠針做手術, 心臟通波仔手術等等....一共6個環節~ 全部道具都好認真, 仲有好多工作人員協助, 講解又清晰, 真係學到唔少野ga~ 正過童夢城好多!
做媽咪既梗係成日幻想仔囡大咗會咩職業~ 我問仔想唔想做醫生, 佢話唔想, 因為佢想做工程師多d喎~ ^^" 將來既野仲有好多變數, 不過做人有夢想絶對係好事~ 希望阿仔努力, 將來可以做到自己喜歡既職業~ ^^
沒有留言:
張貼留言