農曆新年 - 狗年

農曆新年前幾天, 鄧生都開工夜收, 我帶病自己帶阿囝去行花市~ 佢細個時有行過, 但上年太忙無去, 佢就好似失憶咁, 話自己從來無行過花市....=.= 今年大個囝, 想佢清楚了解咩叫行花市, 所以2母子戴住口罩, 快速行咗半個鐘, 叫做感受過行花市的氣氛~

入到花市乾貨檔, 大部份都係啲唔等駛既野~ 我同仔講只會買一樣野比佢, 叫佢諗清楚揀d乜~ 最後佢揀咗個thomas 氣球 (咁細個, 講價後都要$40....), 我又揀咗個閃燈壓力球比妹妹, 仲買咗2包糖, 1 包唔好食的魷魚絲~ 咁就買完喇~

在花市無心機慢慢揀花, 反而行返屋企時路經花店覺得啲波波菊都幾靚, 就買咗5支 ($30/支)~

年30晚, 都係不停執屋佈置、入利是~ 鄧生就拜神~

大年初一, 幫2個寶貝扮靚靚, 等舞獅到~ 然後我就同阿囝出去睇戲~ 屋企附近開咗IMIX之後, 睇戲真係好方便! 新年幾日假期我哋一共睇咗3套戲~  陪囝睇"快d啦牛牛"~ 不過寶品唔太鐘意睇, 不停問幾時走.....下次唔係佢喜歡的卡通, 真係唔好浪費錢去睇戲喇, 成日叫走....=.="

本來諗住年初一叫齋食, 不過啲齋舖都只做盆菜or套餐, 我哋得幾丁人, 實食唔哂~ 所以就放棄食齋, 去商場搵野食~ 去咗新開的老夫子餐廳, 都唔駛等位~

戲又睇咗, 因為我哋都唔駛去拜年, 婆婆未得閒, 所以我哋無聊無事做就去公園曬吓太陽影吓相~ 妹妹剛剛好番, 俾佢曬吓太陽都好~ 今年初一超熱呀!

 
妹妹第1次坐鞦韆, 好開心~

晚上我哋把哥哥交比公公婆婆湊, 妹妹交比工人姐姐, 之後我同鄧生就同朋友去neway 唱K食k buffet~ 依加唱k市道真係好差吓, 勁少人呀! 4百蚊2個人, 包埋野食真係抵!! 雖然我哋都係唱舊歌, 不過咁樣消磨幾個鐘, 輕鬆吓都唔錯吖~ 晚上回家同鄧生再搵野睇, 揀咗"春嬌救志明", 因為仲未睇過~ 放假真係爽呀!! 放假真係好開心呀!!^^



年初二, 瞓到11點起身, 出發去林村!~ 哥哥跟公公婆婆回鄉過年, 所以今年妹妹可以跟我哋去街~ 妹妹新年出咗幾日街後就愛上咗去街街喇~ 每次我落樓佢就好緊張要企要起, 示意要跟埋我出街~ ^^"

雖然每年都好迫好多人, 不過我都係覺得林村算係hk幾有新年氣氛的地方~ 有表演睇又有野食, 都係一個幾好的新年節目吖~ 今年幫哥哥許願,希望考小學順順利利~

年初三去咗奧海城同朋友食飯拜年~

初四哥哥返咗hk, 我哋都係去街食吓野, 睇場戲就渡過埋最後一日假期~

美好的新年假期咁就完結咗喇~~ 放假真係開心!

可惡的乙型流感

就在農曆新年前2星期, 哥哥感染咗乙型流感.....應該係去學野時被惹到的, 第1晚發燒38.9度, 食退燒藥後退咗燒, 我仲以為識退應該唔係流感...第2日都係有少少低燒, 公公婆婆話一定要帶佢去睇醫生, 唔好食舊藥, 反正都睇醫生, 不如搵個有得做流感測試的? 好過估估吓~ 點知check完話佢中咗乙感......>.< 即時擺低佢在婆婆屋企隔離! 好彩臨近新年, 公公已經快收勞, 所以可以幫我睇住個仔, 我就唔駛請假照顧佢~

過幾日後, 輪到我發燒唔舒服! 去做測試, 醫生話無中流感, 比咗幾日藥我, 但我食咗藥都仲係好咳, 又流哂鼻水.....成個星期都仲係病到暈陀陀咁, 我真係覺得醫生驗錯, 我勁似中咗流感囉....>.< 我自己睇咗3次醫生先好番少少......

本來諗住今年情人節提早少少weekend假日去食飯同埋同仔去行吓花市~ 點知星期日下午, 去緊男拔open day時, 妹妹就發燒, 我哋就趕回元朗立即搵診所做測試, 證實咗中咗乙感....真係超氣餒....最唔想發生的事都發生埋, 妹妹又要食特敏福! 因為診所唔敢開特敏福比bb, 所以我哋先去最近的博愛醫院, 佢話要帶bb去等見醫生, 無得只配藥....唔想在政府醫院等太久, 所以就帶bb 去法國醫院, 因為知道有24hrs 門診, 點知佢話我無拎流感測試果個試盒去, 證明唔到妹妹有乙感, 如果重新做test要等第2朝9點! 姑娘話醫生信唔足夠證明妺妹有乙感.... 激死我! 唯有再轉去仁安, 仁安就信封醫生信, 唔需要重新做test! 不過都等咗2hrs先見到醫生~ 醫生話食完特敏福幾日就會好~ 我都有問醫生到底有冇副作用, 醫生又係話絶少會有副作用(睇哥哥果個醫生又係咁講), 話連大肚婆都可以食, 叫我哋放心~ 最後拎埋藥, 返到屋企都11:30pm喇....奔波咗成日, 揹住妹妹5個鐘, 真係攰到我吖! 仲要我自己都未病好..... 返到去工人餵妹妹食粥, 鄧生竟然自己話煮麵食! 佢十年都唔煮一次野, 我真係有啲擔心佢攪唔攪得掂! 我叫佢等一陣工人得閒先煮, 佢又話唔駛, 最後煮咗一個近乎無湯既出錢一丁麵比我! 真係如我所料, 佢係唔識煮野....不過佢主動做, 我都唔話佢la, 反正我食緊藥真係食乜都無胃口~

可能因為照顧妹妹唔夠瞓, 半夜又成日咳, 所以我的病係無乜好轉...情人節當天我照返工, 收到束花幾開心~ 不過臨放工時我真係好唔舒服, 最後同事幫我call咗uber 由金鐘返元朗, 盛惠$500...好肉赤! 返到屋企我死吓死吓咁返房瞓覺, 鄧生問我去唔去隔離商場睇吓有咩啱食, 我真係無力, 叫佢買外賣返來食算喇~ 結果今年情人節, 我哋在家裡食大家樂外賣......而又因為我太病, 今年係完全唔記得咗, 無同束花合照過~  所以真係幾時都係身體健康最重要! 無健康真係乜都做唔到!

今個年尾花咗好多$$睇醫生, 仲要無啖好食~ 年30晚買咗啲碌柚葉嚟沖涼! 希望黑氣盡去, 狗年好運年年~ 新一年大家平安健康就夠!!

男拔Open Day

星期日係男拔小學部open day~ 相信好多有囝囝的家長都會想帶囝去參觀吓了解吓神校~

雖然自知N無人事係超難爭到小一學位, 除咗成績表現, 相信家長background都會非常看重~ 阿囝又無乜野出眾的特異功能, 真係無期望過會入到神校~ 不過自古成功在嘗試, 試咗仲有機會有奇蹟出現, 唔試就一定無~ 而且無需過海/上山, 位置都算好方便吖? 所以應該都會照報名面試~ 

  

今次去open day可以順便當搵定路, 咁第時嚟面試就慳番啲搵路時間喇~ 喳車難搵位泊, 所以一定係坐鐵路去穩陣~ 搭西鐵去紅磡過對面月台轉東鐵搭1個站去旺角東落車, 行一陣就到lu~ 我同鄧生都係第1次去男拔咋~ 幾方便喎~

入到去好多人~ 好多囝~ 大部份課室都擠滿人~

寶品今次算係第1次去參觀小學, 因為經驗少, 所以佢參觀完已經話鐘意個電腦室, 話第時想在哩度讀書喎~ haha~ 我真係怕會令你失望喎~ ^^" 你睇多幾間再講la~ 可能好快你就撈到亂哂, 唔記得邊間打邊間lu~

入啲課室參觀, 阿囝自動波拉櫈坐低自己玩, 頭也不回, 唔多理阿媽....

入到電腦室(應該係STEM room?), 有得坐低打機玩遊戲, 寶品非常喜歡, 玩到唔捨得走....走咗之後都不停問幾時返去電腦室~ 男仔都係鐘意打機......

除咗電腦, 都有啲機械人玩吓~

睇睇吓....突然收到工人電話, 話妹妹發燒, 38.6度, 我心知不妙, 應該係中流感, 所以即刻趕返元朗帶妹妹去睇醫生....星期日好多醫生都無開, 選擇好少, 真係煩 >.<~~

終於識啋四輪單車....

沉日寶品去同學仔屋企玩~ 一大班男仔一齊踩車~ 同學仔家裡有各式不同種類的單車、腳踏車、balance bike 、電動車.....人人有份玩唔駛爭~

上次去camper van時, 寶品仲係未識踩單車...係有扶助碌的四輪車都踩唔掂!! 其實學校好多單車俾小朋友踩, 但小朋友可以自己選擇玩唔玩,  寶品一直都係唔會主動去踩~ 我哋平日夜收工無乜機會陪佢出去踩單車, 又信唔過工人姐姐帶佢出街踩, 所以寶品遲遲都未識....

沉日去到同學屋企玩, 出奇地見佢已經踩到單車喇!! 雖然係龜速^^", 不過都好開心佢終於捉摸到點樣踩~ 知道K3好多幼稚園會安排去交通安全城踩單車, 我之前仲擔心如果到時仲未識踩就會有比較, 怕佢唔開心~ 依加一天都光哂~ ^^"

唔通因為架車係綠色, 所以佢肯踩? 

我同自己講, 考完小學, 上到K3, 我真係要cut其他野, 俾佢做多d運動先得~ 

 寶品不停慢踩, 一個人自言自語, 悠悠閒踩咗好耐~ 之後就一齊玩放飛機~ 又發現佢哩方面都玩得好差.....手腳唔協調所以放唔到~ 真係要比多d 機會佢玩先得喇! >.<

 

玩咗幾個鐘, 之後好勤力繼續去學游水, 點知上水冷親, 當晚即發燒! >.< 我好內疚點解我唔停一堂 or 迫佢沖個熱水涼先走呢? 不過已成事實, 唯有下次盡量避免冷親la~