聖誕開篷巴士遊

我哋一家都未坐過開蓬巴士, 之前睇朋友blog知道聖誕坐開蓬巴士係幾有氣氛幾開心的事~ 所以今年就試吓一齊去坐吓~ 寶品知道後期待咗幾日~

我哋坐goldspark hk的開蓬巴士, 團購價$58/位(大小同價)~ 

剛剛星期六只得12度, 晚上應該更加凍~~ 不過有得玩, 都唔記得個凍字點寫ga 喇~^^" 幫小朋友們著夠衫就ok~ 冷帽頸巾一定要戴, 因為真係堅大風, 唔好吹親個頭~

我哋坐9點車, 全程25mins~ 有一位導賞員負責導賞~

在尖東上車~ 我哋早咗半小時到達, 外面太凍, 所以入咗酒店坐吓等到夠鐘~ 

鄧生臨出門口先嚟胃痛, 頂唔住決定唔去坐巴士....浪費咗1張票! 真係可惜~

上車喇~ 睇吓寶品幾咁開心, 佢好興奮~ 相信在場大部份小朋友都同佢一樣咁high~

除咗睇靚靚燈飾, 途中仲會穿過2條幾秒鐘的小隧道~ 又快又大風, 有少少似坐過山車的感覺~ 大部人都好開心, 係咁叫~ ^^ 

好佩服導賞員可以唔駛戴帽吹足25mins.....真係頭都痛~

去到海旁, 會停低俾大家影吓相~ 夜景好靚~ 大家喪影影影~

寶品今次旅程仲識咗個靚女~ (坐前面的小妹妹) 佢哋2個雞啄唔斷, 好似相逢恨晚咁, 即係做哂朋友, 係咁吹水~ 哈哈, 佢真係識揀!~ (真係幾靚女ga^^") 

歡樂的時光過得特別快, 好快就坐完巴士之旅~ 出年一定會再坐!!