歲半寶品~ 中哂豬毒!!!

我的小寶品咁快就1歲半喇!!! 上星期去健康院打歲半針, 之後竟然無發燒! (可能因為我臨瞓前餵定1次退燒水) 實在太好了! 不用辛苦, 媽咪我就安心好多~

因為寶品講野唔算叻, 好有性格, 唔鐘意跟住我哋學講野, 所以2歲又要返去健康院再跟進吓說話能力~

姑娘話佢要戒奶樽喇!! 感覺我的bb真的要長大了, 要同奶樽講byebye.....媽咪我同寶品一樣咁唔捨得, 我真係唔捨得你大得咁快, 留戀住你baby時的感覺!

阿妹轉做FTM後, 在家裡攪英國代購~ 自從認識咗英國很受歡迎的粉紅豬Peppa pig後, 我哋的小朋友全部中哂豬毒!!! 真係好毒好毒!

起初我覺得哩隻豬幾醜樣, 連記住佢既名字的動力都無!!

後來開始幫阿妹賣野, 開始鐘意peppa pig的圖書, 之後買埋dvd就開始中毒喇!!!

喜歡peppa pig的原因係因為啲圖書quality超好之餘, 英文係英式英語, 字句簡單又生活化, 從豬氏一家人平日的生活事, 返學遇到的事, 小朋友可以學到好多生活有關又實用的英文~ 仲有教埋佢禮貌同埋相處之道~ dvd非常有趣攪笑, 寶品依加大愛, 日日都睇到咔咔笑, 好似真係睇得明咁!!! 其實佢得歲半, 有時我都唔知佢明白幾多, 但佢真係好enjoy!!!

書我係絶對捨得買俾囝囝的, 所以我買咗好多peppa board book俾佢, 佢好鐘意, 睇得好開心~ 這亦係媽媽中豬毒的原因之一......

暫時我只買board book, 無咁易爛, 大少少先買paper book~

除咗哩d仲訂咗d新書未到~ 實在太多款, 買哂的話荷包都乾喇!

寶品最喜歡這套6小本書仔, 可能細細本啱佢手形~ 佢真係每日都睇, 唔睇唔安樂!! 每日都會拎住俾我同工人, 叫我哋讀俾佢聽~ 不過佢仲細, 未識愛惜書本, 結果本本都俾佢玩到甩皮甩骨...中間爛開哂.....

見佢咁鐘意, 我就索性買埋公仔嚟講故事用!!

呵呵~一係唔買, 一買就買齊啲! 連佢啲同學朋友都買埋~ 講有關朋友們的故事就可以更投入了~

寶品第1眼見到堆公仔係開心到癲哂~ 好high~~

中毒的仲有佢2個表哥~

所以鄧生生日時, 蛋糕都好update, 揀咗個daddy pig 蛋糕~^^

除咗書同activity books, 隻豬仲有好多產品賣ga~ 好多都好靚~ 尤其女仔野!!!!

如果有其他媽媽想買peppa 野都可以搵我哋ga~



寶品手指受傷了@ 1歲半

1星期前, 發生咗件令我驚慌失措的事, 就係我竟然剪到寶品的手指仔!

事源當晚我在朋友家餵飯, 因為無high chair的關係, 寶品坐在我大脾上食飯~ 我一路逐d 餵, 逐d用胶剪cut 菜同埋肉.....其間我媽打電話給我, 我繼續邊講電話邊cut 菜, 一時無留神唔知寶品伸咗隻手入嚟, 就cut到佢喇!!! >.<!!!!!

佢隻手指即時流咗好多血, 驚到我不知所措, 搵紙巾包住, 唔知點算好! 之後好快決定落街搵診所消毒止血, 點知撞啱星期日, 無診所開門! 我抱住個仔唔知點好, 又怕去醫院要等好耐, 最後還是由朋友陪伴搭的士去咗最近的博愛醫院! 最後, 博後係幫唔到我哋的! 政府醫院乜都要等, 等見醫生要幾個鐘, 最重要係佢哋唔連消毒都唔幫我哋做, 叫我等見醫生! 寶品喊得太勁太淒涼, 鄧生嚟咗, 我哋決定去私院啦! 立即搭車去法國醫院.....

在私院好快有得見醫生, 好彩無傷到神經同埋骨, 只係cut到d 肉....不過都夠我心痛死了!!! >.< 我真係極度唔開心, 覺得自己好大懵, 無睇實個仔......

好多人事後都問我鄧生有冇鬧爆我? 結果係無既~ 試問天下間有邊個媽媽會想整傷自己個囝呢? 阿囝受傷, 我個心係最痛的! 我同佢係血脈相連ga嘛~ 鄧生叮囑我以後要更加注意家居安全~ 經過今次咁深刻的痛, 我以後用鉸剪都有少少陰影呀.....>.< 真係唔可以在小孩面前剪野!

經過一個星期, 寶品的手指傷口已經好得7788了, 大家都可以放心~ 不過就因為去咗2轉醫院, 回家立即感冒了......唉, 我又令阿囝受苦了~ 希望佢唔會怪媽咪啦.... T.T

Page 1 減價啊!

Gateway的page1即將搬遷, 所有正價書8折, 玩具精品7折!!!

明明已經過咗書展, 又再俾藉口自己買書俾個囝tim!^^" 不過真係幾抵~

之前想買個防走失背包俾寶品, 睇中咗hugger, 因為有款係青綠色的, 而且質量非常好~ $199有啲貴, 諗咗好耐先決定買, 點知會展已經賣哂哩隻色! 買唔到一直唔甘心....無諗過今次去到page 1 , 竟然見到有7折!!!! 突然變得超抵買, 好開心啊!

右上方的圖鑑寫住在日本賣出超過100萬冊, 我都曾經見有些代購賣過~ 今次$66再8折! 好抵買啊!!

適合1-4歲兒童, 裡面的生字係中英文對照的, 講平日生活上常見到既野~ 雖然唔係真實圖片, 不過啲卡通都好可愛~ 全本係硬皮board book, 啱哂1歲幾的寶品, 唔易撕爛~

另外TOMY車仔同埋動物都有7折啊!!!! 平日覺得60蚊一架車/ 動物好貴, 我只買過幾架車仔and 動物俾寶品, 唔捨得買多~ 而且TOMY的collection 咁多! 儲齊要洗唔少錢..... 今次有折, 動物折咗around $42一隻, 就買多幾隻俾寶品玩啦~ 雖然貴, 但quality真係唔錯既~

因為寶品的書本越嚟越多, 最近買多1個書架放在客廳~

雖然專家話書同玩具應該分開擺放, 但香港哋有幾多人屋企大到可以分開玩具房同書房? 寶品平日的活動範圍只在客廳, 為咗方便佢, 只好把書同玩具都放埋一齊~

依加成個廳好似兒童樂園咁, 都無格調可言ga喇~ 但求整整齊齊, 唔好七國咁亂就得~

第3年行BB展

不經不覺, 今年已經係第3年行BB展喇!! 時間過得真快, 婚紗展好似已經係離我好遠既事~ 連續幾年都有行BB展, 未生時有好多野需要買, 生完之後都有好多日用品啱買~ 所以今年又行吓囉~

最開心係買咗個青色喼俾寶品遲吓去旅行用~ 其實一直都心動想買, 不過覺得貴而且大個咗就唔啱用....所以無買~ 今次見到只售$299, 仲要有寶品最愛的青綠色!!! 唔買都唔得喇~~ 其實個喼平時在家裡都可以當玩具箱放玩具既~

另外買咗一套用粟米造的餐具, 話花咗都唔會有有害物質~ 米黃色簡簡單單都幾好吖~

遲D打算帶寶品去台灣玩一轉~ 所以去荷花買咗半打即棄奶樽~ $20/2個, 價錢可以接受吖~ 唔駛洗奶樽方便吖嘛~

另外仲買咗游水片, 施角脫, 牙刷, toilet用櫈仔, 退熱貼, 芝士同埋mustel 沐浴露(1年份量)~ 本來想買埋睡袋同埋防走失背包, 不過最後覺得貴無買~

bb一路長大仍然有好多野啱買, 真係每次bb展都要出血~ ^^"

愛飲品的寶品~ 自從飲過紙包飲品後, 佢真係超級鍾意飲綠茶! 或其他紙包裝的飲料.....我都知道咁樣係唔好, 以後想飲都要等佢瞓咗先可以飲, 不然佢就會係咁求你、發爛炸係都要飲到為止......=.=" 

 同大家介紹哩套飲茶玩具~ 真係好cute, 像真度都幾高~ 最鍾意佢個蒸籠! haha~ 在千色店買$99~ 快d去搶la~~~^^ 

BLOG友BB聚~

相信好多BLOG友仔都會認得哩幾位小朋友~ 

分別係ANKI~ LITTLE K~ 寶品~ 同埋BENSON~

哩4位BB終於第一次相聚~ 點解可以咁乖乖坐定定俾我哋影相? 因為電視播緊巧虎lor~ ^^" 佢哋四個都差唔多大, 啱玩之餘, 媽咪們啲話題都好啱傾呀~ 話咁快就玩咗一個下午要散band~ 期待下次再聚呀~ ;) 

我哋有我哋影相, 佢哋有佢哋照玩~

知道2位美女BB會嚟, 我之前一晚放工回家後立即拆箱砌好套玩具廚房用嚟招呼朋友! 哩套Step2玩具廚房我買咗1年ga喇~ 一直未拆嚟玩, 因為寶品仲未啱玩~ 依加都啱時候拆ga喇~~~ 原來要上好多螺絲, 砌嚟砌去, 攪到我一頭煙! 最後鄧生返嚟幫手終於攪掂咗~ 好開心呀!! 我夢寐以求的玩具廚房!! 像真度高, 架餐又多, 好正ga~ 

Benson哥哥隻雞燒得好靚喎!~ ^^

Little k 媽媽買咗個餅嚟一齊食~ 2位美女bb好忙咁分緊碟~

寶品同埋anki最愛的星形pan cake~

我成日都覺得寶品經常自己一個在家玩好苦悶~ 我哋住村又無會所, 無得成日去play house 玩~ 所以多啲朋友仔陪佢玩吓爭吓玩具對佢絶對係好事~ 都係時候要開始學習待人接物, 學吓同朋友相處喇~ 

以前的寶品好容易就大喊~ 真係成日都嚇怕哂佢啲朋友仔....^^" 1歲之後開始慢慢有改善, 依加仲笑多咗好多tim!! 我之前真係好驚佢會持續做"爆喊仔"ga.....  

2014 書展

其實我一向都唔係愛睇書之人~ 以前去書展都係好膚淺咁買吓漫畫同埋食譜咁~ 近哩2年去書展的動力都係為咗個囝!~ 愛閱讀的好處不用多講, 所以都好希望培養到阿囝鍾意睇書~

上年買咗好多睡前故事(中文)同埋字咭~ 因為寶品仲細, 90%都未開嚟睇/玩....所以今年我完全無認真行過兒童中文書區~ 只係留意英文的~ 不過鄧生不停在旁邊說: 屋企有好多, 唔好買喇~ 其實我都知道家裡已有好多書, 不過總係想再買啲未有或特別的圖書~ 最後在非常忍手的情況吓, 只係買咗10隻手指都數得哂咁多本...... 硬係覺得2個人俾咗$50入場, 唔買多D就唔抵~ ^^"

寶品天生愛綠色~ 非常誇張地几乎所有物件都選擇要綠色的~ 買這幾本thomas書仔($100/3本)前我都有諗過佢會唔會只睇綠色哩本唔要其他呢? 結果真係齋睇綠色, 其餘的塞俾佢都唔要.....>.<

人形人體器官板, 前後不同, 一面男一面女, 一面中一面英~ $45

今次去書展的另一個目的就係續訂巧虎~

因為寶品超級喜歡巧虎, 所以就算加咗價, 我都會繼續訂~ 只要阿囝開心又學到野, 我相信係值得的! 下次再分享吓巧虎教材的心得感想啦~

小朋友開始睇書, 當然要有張書桌俾佢習慣坐定定閱讀/玩玩具~

之前已經買定咗一張step2兒童書枱, 不過依加寶品歲半都未夠, 未啱坐~ 所以我買咗一套超細張的麵包超人桌椅~ 佢依加坐啱啱好, 非常fit佢的身高~ 而且包記的產品品質真係又好又靚~ 貴少少都值得!

起初寶品所有櫈仔都唔肯坐, 我都好擔心會影響到佢N班面試的表現! 好彩依加唔駛迫都肯乖乖自己走去坐低玩同埋睇書~ 實在係學習階段的一個好開始!!

愛購物的我, 見美國代購賣摺台連2張櫈仔都只係賣4百蚊有找~ 所以又買一套for小朋友一齊食野/ 玩樂用~

芝麻街公仔好靚~ 品質普普通通, 不過唔知點解2張摺櫈開咗無辦法關返.....>.< 要長開住, 就有麻煩! 

當寶品(14M)遇上熊貓~

又好耐無蒲頭tim!!~
無計啦, 今時唔同往日, 依加返工忙咗好多, 又無以前咁free, 好多時睇blog的時間都無, 唔好講話寫...... 放工後我家又要服侍寶品大少, 所以係完全無哂私人時間咁制喇~
唉~ 唔好再呻咁多, 講吓個囝的近況先~

不經不覺已經14m喇!! 今個月佢明顯生性咗好多!! (一陣再講佢之前有幾咁唔生性!)

見好多人去抱抱熊貓咁開心, 所以我哋又去抱埋一份!!
鄧生去到先知道原來係無冷氣的! 簡直係晴天霹靂!! 立即想走人~~~~
因為驚人多附近又無位泊車,  所以我哋選擇搭車去, 由上環地鐵站走過去~
原來有段距離之餘, 仲要行斜路!!! 大熱天時, 未到PMQ已經成身出哂汗!

不過寶品去到見到啲熊貓超開心! 全程哈哈大笑, 開心指數可以話真係爆哂燈!!! 幾辛苦都變得值得!! 回程時鄧生立即決定搭的士返元朗, 因為真係熱到溶咗, 無力再行去搭車轉嚟轉去喇~


我發覺寶品真係超級鍾意動物! 每次在街見到啲貓貓狗狗金魚都會好興奮!
今次見到熊貓都唔例外~ 明明10級眼瞓都即刻成個人生猛哂!




見到佢咁開心, 其實都好期待帶佢去旅行, 俾佢見多D真實的動物~
不過佢一向都好唔合作, 令到我哋唔敢帶佢去旅行住.....
好多人覺得係必然既野, 偏偏我個囝就係唔鍾意~ 唔合作~

講吓佢有咩與眾不同先~

1. 唔俾陌生人抱, 去到陌生的環境一定要黐住我, 不然就會爆喊!
2. 唔肯坐BB車, 一擺佢落去就喊到癲咗, 我嘗試在家裡多D 打開架車, 等佢習慣, 但係佢一見到我哋打開, 佢就立即喊......掂都唔會掂吓架BB車......
3. 唔肯坐櫈仔, 又係一擺佢落去就立即起身逃走, 唔鐘意坐.....
4. 出街唔肯自己行路, 在家裡係會4圍走的, 偏偏去街就只愛hip seat, 一步都唔肯行!
5. 唔肯坐單車/電動車, 見到都會喊.....攪到部mini林寶被打咗入冷宮.....
6. 唔鍾意去會所playhouse放電, 對滑梯及爬高爬低的設施完全零興趣!

其實佢仲有好多野唔鐘意....其他bb喜歡做的, 佢都唔喜歡.......
講到尾佢就係太黐身, 同埋容易喊.... 所以單單以上哩幾點, 已經唔敢帶佢去旅行啦!


正當我一直都苦腦點解我個囝會樣樣都唔鍾意玩, 淨係鍾意黐住我時..... 就在第14個月, 突然來個自動波大轉變!!!

最近我硬著心腸尤得佢喊咗2鑊後, 寶品終於合作地肯坐bb車喇!!!!~~
可能大家會覺得我誇張, 個仔肯坐車就咁開心!!
唉~ 原來bb坐bb車唔係必然ga! 試過你就明~
諗起以後可以少d揹住出街無咁累, 真係勁開心!


除咗坐bb車外, 寶品仲肯俾其他人抱~ 坐單車~ 坐櫈仔~ 同埋有時自己落地行tim呀!!! (哩d野其他人唔駛迫都會做......)
不過事實證明咗, bb去到某個時候真係會自己去接受不同的事物, 做父母的係急唔嚟~ 迫唔嚟ga~ 所以雖然相比起其他同齡bb, 寶品學習進度有d慢, 不過我都無太介懷~ 因為我知道大大吓就慢慢會懂~ 邊個叻d遲d至知~ 況且做人唔需要吓吓做最叻既, 不過不失, 有禮貌有品我已經心滿意足~

希望寶品bb繼續進步, 向乖寶寶目標進發~~~

姐姐再見了~

照顧寶品的工人姐姐, 因為身體太不適,唔可以繼續工作落去, 最後決定返印尼了~

記得起初我係超級想請工人, 因為好唔想住多一個人唔熟識既人在家裡, 又擔心佢會偷野或對BB唔好, 好多唔好既幻想!!(我份人就係咁, 永遠諗定最衰的情況) 不過經過10個月既相處, 我慢慢已經習慣咗工人既存在, 而且佢好錫寶品, 家務方面亦好自動自覺, 打理得幾乾淨企理~ 邊D玩具少咗唔見咗佢都好清楚~

雖然有時我會唔鐘意佢同我爭抱BB, 或者有時我整親BB佢會好似怪我咁既語氣.....不過整體嚟講, 我覺得佢都係一個好姐姐, 唔貪心又幾勤力, 已經非常難得~

姐姐同我哋道別時, 抱住寶品喊住話佢一定會好掛住BB, 感覺到佢真係好唔捨得寶品, 此時此刻成個氣氛真係好傷感, 我都忍唔住喊咗出嚟! T.T 原來要離別既感覺得咁唔開心! 一諗起可能以後一世都唔會再相見, 我個心就好心up.....好不捨..... 衷心希望姐姐返去快快醫好病痛, 他日有機會再來為我們打工! 雖然我知應該會係好多年後既事.....我哋依加keep住what app聯絡, 可以知道姐姐近況如何~  

至於寶品, 因為仲細, 完全唔知我哋喊乜! 亦因為佢未識講野, 所以講唔到比我知佢掛住姐姐~ 不過姐姐係每日陪伴寶品最長時間的人, 我相信寶品心裡絶對有掛住姐姐, 只係未識講野未懂表達......

新姐姐已經嚟咗個幾星期, 我個人仲未好適應到新人, 更何況寶品?

不過我知慢慢會習慣~ 而且今次送走舊工人再請新人已經花費咗唔少錢! 當然希望新姐姐可以做到完約la.....

        



寶品1歲生日會~

繼續寫埋個1歲生日會先~ 點懶都好, 真係想好好記低第1個生日會的細節~

寶品一出世已經有好多朋友仔, 因為我身邊的朋友都係差唔多時間生~ 第時實有伴一齊排隊拎表報幼稚園......

本來諗咗d遊戲諗住生日會玩, 不過bb們仲細, 單夠我既力量,其實都好難控制都場面, 所以我放棄咗集體遊戲, 都係等遲d大個d先玩la~

1歲生日可以玩傳統的"抓周"~

我整咗d問卷仔俾賓客填, 估吓寶品最後會拎邊樣野~ 估中有利是一封~

唔知同利是有冇關, 大家一齊參與同埋好緊張寶品到底會拎邊樣野~ haha

媽媽我最想佢拎牙刷, 因為我個人覺得做牙醫唔錯呀~

不過現實係仔大仔世界, 佢大咗就有自己思想, 想做乜都由佢自己決定, 係一個獨立個體, 唔再係你想佢點就點ga喇~

佢最後揀咗計算機!!~ 唔通真係會做會計師? n年後俾佢睇番, 睇吓準唔準先~^^

我在拍賣網買咗個pinata~ 拉繩版~

小朋友們輪住揀1條繩嚟拉, 其中只有條拉中係會跌哂d糖落嚟~

終於都有人拉中喇! 不過小朋友們仲細, 基本上無乜糖/朱古力係食得既....只係執嚟玩吓~

我帶咗泡泡機去~ 寶品好鐘意泡泡ga~

每位小朋友有一隻動物氣球同埋一袋回禮小禮物~ 

在淘寶淘的太陽眼鏡~ 不過收貨後才知道quality麻麻哋....都買咗了, 算吧~ 粗粗哋玩吓就算~ 

  

阿妹妹夫好有心, 買咗D扭扭氣球花俾寶品~ 可以用嚟做佈置/影相用~

仲有好朋友送的車車!

玩具~

靚衫同埋利是!~

連工人姐姐都有禮物送俾寶品!

不過最大份的禮物, 都係鄧生送的林寶堅尼~

寶品baby仲早過angelababy收林寶ga~ 不過係超迷你版啫~^^"

有咗架超跑, 追bb女應該掂擋好多~ XD



其實我一直都話自己買俾阿囝的玩具都係諗過有教學作用/有意義的! 哩架林寶其實絶對係奢侈的玩具......不過記得我細個時, 都非常恨有一架電動車可以玩喳車~ 既然屋企夠空間擺放, 又不至於貴到買唔起, 就滿足吓自己既心願, 俾一個美好的童年回憶阿囝la~ 架車可以搖控或自行操控, 前波後波打燈concept應該起碼要2-3歲先識, 要自己控制自如都唔係咁易~ 所以都算係學到野既玩具吖? : p

至於我又送咗d咩俾阿囝呢? 就係一套大大座的玩具廚房喇!! 又係因為我細個時好恨有一套大廚房, 所以依加自己滿足自己囉! 健康院都建議買煮飯仔比小朋友玩, 學習角色扮演~ 不過送咗嚟好耐都未拆箱呀~ 見寶品未識玩, 所以就唔想咁快開咗封塵~ 另一個原因係因為幾大座, 要砌都要d時間, 所以就懶懶行遲遲未開動.......

今次生日會前, 我告知朋友仔們不要買大型玩具或名牌靚衫, 一來寶品已經有好多, 二來我怕生日後出現禮物山(小朋友坐在禮物山前影相)..... 我驚佢會慢慢以為生日係好大件事, 期望生日會有超多禮物, 多到几乎1年都拆唔哂嚟玩......為咗唔想浪費, 唔想太寵佢, 唔想佢得來太易變得唔識珍惜..... 媽媽好恨心地mok削咗佢收禮物既權利.....希望佢第時會明白我係為佢好, 希望佢會珍惜每年的生日蛋糕同埋爸媽送的生日禮物~

至於親友們的生日利是, 全部都會用嚟做寶品的教學經費~ 支助吓上playgroup學野咁~ 多謝各位呀!~