幾時上playgroup好?

寶品踏入8個月後, 我開始諗應該幾時開始俾佢上playgroup?

我認識的mami朋友中, 有啲6個月已經開始上, 亦係啲係完全無俾小朋友上playgroup~ 我認為小朋友隨住生長發展, 好多野慢慢自自然然會學識, 我唔急於太早train阿囝, 亦覺得贏在起跑線都唔代表他日一定讀到書, 一定飛黃騰達.....

我擔心的, 就只係幼稚園學位!!

為小朋友好, 我哋一定係選擇自己區的學校, 返學方便最梗要! 如果要小朋友咁細個晨早起身搭車誇區返學, 我覺得有d攞苦嚟辛, 小朋友亦未必快樂~

可是元朗區係繼北區之後第2個爭學位區.....雖然寶品係蛇仔, 無龍年效應, 之但係預計可能有3分1的龍細仔爭唔到學位會退落去同蛇仔同屆讀書~ 做大大B~ 所以蛇仔學位都一樣會多人爭~

對於我哋哩D完全無人事關係的家庭, 單係1張報名表, 都要排餐死! 想入到理想的幼稚園, 咪就係唯有靠小朋友interview表現好,同埋合老師眼緣囉!!

跟據小攸子近日多次的interview經驗, 發覺元朗區好多幼稚園的interview問題並唔深, 只係問啲日常基本野~ 看來學校並唔係要求小朋友有幾叻, 最睇重都係肯唔肯聽老師指令、有冇喊、有冇四圍走、有冇十問九唔應.......

因為寶品每日超長時間都係跟工人姐姐獨處, 加上我唔會俾工人自己帶佢去街街....所以平日真係長困家中! 想俾佢見多d世面, 多d同其他小朋友相處, 同埋學習聽老師的指令, 我真係覺有報playgroup同埋n班的需要~ 唔想佢既世界經常只有佢同埋工人~ 對住工人不如早d返學讀書, 啟發佢既潛能, 同埋適應團體生活~ 咁遲吓interview都可以無咁怕羞! 我唔想他日佢in得差, 我才來抱怨自己無幫佢報pg/n班做準備.....

近日開始搵playgroup資料(只搵元朗區), 有幾間都話要足1歲先可以上堂~ 睇嚟應該等寶品足1歲先上pg了~ 到時大d, 吸收都應該好d快d~

其實近年身邊好多朋友都生咗bb, 我哋周不時會攪bb gathering, 其實咁都可以為寶品增添不少同小朋友相處的機會!^^

   

 咁啱寶品成日都係做細細佬, 排最尾~^^

從相片可見, bb性別比例真係男多女少呀! 囡囡變得很矜貴~

初生的寶品, 細細粒又黑蚊蚊.......

  

 又係全男班~ 其實仲有我的小學同學未gathering過, 又係全部都係生囝囝@@!

終於有番個囡囡(小樂兒)~ 無咁悶~~

bb們越大越難control, 想佢哋整整齊齊泊住影相? 好難喇!!各有各玩, 采你都傻!~ haha

當然最經常見到面的, 都係2位表哥仔~ 小攸子+迪迪~

有人一齊爭玩具玩, 真係寧舍好玩的! 



扮野媽媽～

BB未出世時，已經好期待為佢扮靚靚～出世後，我覺得扮靚之餘，仲要扮埋得意攪笑先滿足到我自己！變態媽媽甚至將佢扮埋嫦娥！佢仲未知發生咩事，我哋就笑到反肚～寶品有時真係好cute!＾＾

之前在影相影過立體相後, 好想自己試吓影~ 雖然無打燈又無靚鏡頭, 影得麻麻哋, 不過當玩吓~真係好好笑!~

嫦娥奔月~~

寶品+迪迪~ 大家睇唔睇得出佢哋在富士山下浸緊溫泉? 哈哈~ 影時真係覺得佢哋好cute好好笑!

仲有幾日就哈佬畏了~ 係時侯又變身了~ 今次變咩好呢? hehe^^~

濕疹之苦

話說我產後第1天便開始出嚴重的濕疹……中醫話我入咗風，發出濕毒……經過足足2星期飲中藥，山草藥沖涼，乜方法都試哂！最後終於停止了～

舊印未退清哂，近日失驚無神又全身出哂紅點，情況同上次好相似！我真係好驚！！立即睇中醫、西醫……朋友話牛黃解毒片有效，我立即買嚟食……話流感茶有效，我立即買嚟飲！不過都仲未停止到……希望快啲好返啦！！真係又痕又樣衰……

我覺得通常唔好的DNA就最容易傳比下一代！我覺得寶品的皮膚都係麻麻哋！經常敏感，哩度紅、果度紅……試過搽凡士林、mustala、睇咗好多次醫生……搽醫生比的不同藥膏都係時好時壞……最近有朋友叫我試“俄羅納英”～我又試吓啦～

點知搽幾次臉上的敏感就無咗！好使得！！ 好開心呀！三十幾蚊就解決咗一個大煩惱！

新BLOG第1篇!~

終於開咗個新BLOG喇!!! 唔解釋太多點解咁遲先攪掂, 依加仲慢慢適應中, 我覺得好唔習慣, 又唔係太識用呀>.<.....點解D BLOG友可以整到咁靚ga?

新BLOG第1篇, 不如就講吓寶品的新車~

三輪車是小朋友成長階段不可缺少的~ 反正都要買, 我個人覺得早少少買抵玩D, 可以玩長啲時間~ BB識坐的時候, 就可以推住佢去街街, 俾佢四圍望吓野~

之前一路諗住單車仔買1千元樓下的就夠, 點知鄧生見過我朋友個囡架iimo後, 竟然支持買iimo喎! 佢話送俾寶品做聖誕禮物, 我當然舉腳贊成la!!

我哋在baby pace訂, $1422包送貨~

架車真係好靚! 簡單得嚟好高雅~

 

另一個賣點係可以摺, 哩點都幾重要! 無咁阻訂~

同埋大人可以用手柄轉左轉右, 都係方便之處~

寶品第1次試車時, 超開心呀~ (其實佢每次試新野都會覺得新奇又有趣~^^)

不過佢仲未知單車係用嚟坐.... 係咁踩住個腳踏企起身!

Mark 哥嚟喇~~~ 哈哈哈~

出奇地肯俾我幫佢戴太陽眼鏡喎! 遮住咗對眼後, 我覺得佢幾似鄧生呀.....(平時多數人都話佢似我ga~)

講住咁多先, 拿拿聲去搵返d舊blog 友先!!!