2014第1篇~

睇返紀錄, 原來我12月只係出過2篇blog~ 真係好懶呀!~

聖誕節玩足成個星期, 節目豐富, 開心充實~ 好滿足地同2013 say goodbye!

2013年對我嚟講實在係太難忘的一年~ 經歷咗生仔、湊仔、學做人阿媽.....對我嚟講好新鮮~ 同埋有一份講不出的開心興奮! 小寶貝充實咗我既人生, 同埋改變哂我哋既生活~ 我真係好愛好愛哩塊心頭肉~ 

嚟緊2014應該開始要面對"教仔"哩個大難題! 預計寶品都應該係一個有脾氣的惡攪小寶寶~ 我成日同自己講, 人邊會有完美? 更何況一個1、2歲既人仔, 佢只係一張白紙~ 就算好多地方做得唔好, 都唔可以怪哂佢, 做父母的負任就係要不斷糾正, 教好佢~ 我相信建立良好的親子關系有助管教小朋友~ 小朋友信任你就自然會聽你的說話~ 一味打鬧、要求小朋友要點點點點點.......將心比己, 我都會覺得父母好煩同埋好唔開心~ 教仔實在係一門好深的學問, 人人都有自己既方法同埋準則, 我唔要求最完美, 只希望過到人過得到自己~ 做個好人, 識得孝順就得了~

10個月的寶品~

踏入10個月, 識得用飲管杯飲水~ 識扶住野行好耐~ 自己飲奶同埋用手拎星星餅嚟食已經學識咗好耐~ 想食野時會係咁點頭, 點到頭都甩咁既款.....好似同食有關的佢會學得特別快~ 其他發展應該都大至正常~

踏入10個月, 正式開始上playgroup~ (之前試過2堂試堂)

我最後揀咗元朗的"醒目教室"~ 主要係貪近屋企, 同埋試完堂覺得課程都OK啱玩, 全英語上課~ 報24堂就平均$190/堂, 唔算特別便宜, 不過近屋企真係幾重要! 隨住寶品越嚟越重, 又要帶好多野出街, 有時我要自己1個帶佢去上堂真係唔容易~ 同埋我覺得playgroup真係純粹係當玩1個鐘咁, 主要係想俾bb學習同人相處, 無謂太辛苦自己同bb, 近近哋去輕鬆吓咪算~ 想學野嚟緊廿幾年漫長的學習生涯有排佢學呀~

我們上的playgroup每堂都有10分鐘大肌肉鍛鍊環節~ 我見其他小朋友都好enjoy好鐘意玩~ 不過我個黐身仔就唔多鐘意, 迫佢佢先肯爬幾吓.........希望上多幾次佢會慢慢開始enjoy la~

上年臨生仔前, 因為擔心會早產所以鄧生唔俾我食雪糕! 欠我的雪糕火煱今年終於對現了~ 訂咗個classic set 一齊慢慢歎~   

上年你仲o係我肚裡面, 今年你已經咁大舊坐在我大脾上~ 時間真係好似光速行得咁快!