太平山頂遊

話說寶品去上面試班~ 有1堂係講香港名勝, 老師話佢唔太熟識~ 山頂凌霄閣、大彿、昂平360、長洲搶包山等等.... 不過好彩都講得出hk 有邊2個主題樂園(OP, 迪迪尼)~ 的確佢係無去過某啲人氣名勝景點, 而哩d景點多數都唔近我哋~ 近近哋濕地公園反而我哋會去過幾次~ 近吖嘛~ 既然係咁, 就盡量抽時間陪囝去遊覽吓啦~ 巴黎鐵塔就話無可能隨便飛去睇啫, 凌霄閣我哋做得到既~ ^^" 始終親身行過睇過實物會記憶深d, 好過睇圖片, 而且去吓都無壞~ 作為HK人, 認識下自己本土名勝都係好事~

咁啱上星期日晚不用學游水, 鄧生就提議上山頂~  

5點抵達山頂纜車站, 見到超級長的人龍, 職員話要等1.5hrs, 我哋決定等! 因為想俾仔試吓坐哩樣特別的交通公具~ 去附近的小食車買啲零食糖果, 俾囝食吓打發吓時間, 其實佢都捱得到完全無扭計~ 又或者係因為鄧生在場, 基本上囝都係會幾合作又聽話! daddy要求嚴格d~ 如果係我單拖帶佢去街呢....囝就會特別多要求, 而且特別嘈! =.=" 真係雙面人嚟ga! 

來回車票連凌霄閣摩天台, 大人$99, 小童好似$45

在纜車上發生咗爭位事件, 因為啲大陸人用袋霸位(唔止1個), 話成張長櫈都係佢霸咗, 乜交通公具可以幫親友霸位ga咩? 仲要成行要哂? 我彩佢都傻, 照坐, 而且都無其他位可以揀了, 架車超快坐滿~ 跟住就開始起爭執~ 然後鄧生好惡咁鬧個女人1個人霸4、5個位, 全車人靜哂, 全部花生友無人出聲無人幫拖~ 今次我撐鄧生, 因為當時我都氣難下! 不過就嚇親咗阿囝, 唔敢出聲, 望住我哋同人嘈~ 其實我哋都係迫不得已, 想保護返自己的權利!

到達山頂後已經天黑lu~ 直接上凌霄閣摩天台睇風景~ 

好凍! 又大風~ 可能當日好天, 而且係星期日? 真係人頭湧湧....

一場嚟到, 又唔知下次幾時再嚟, 所以我哋決定比錢影相買相~ 揀張靚相留念~

不過都好多人, 食住風等咗15-20mins先輪到我哋影~

$278一張大相連soft copy~ 影得幾滿意! 過幾年後再帶埋妹妹嚟影吓先~^^

之後就搵野食~ 揀咗富士山媽媽, 食日本野的~

座位個view都唔錯~ 寶品成晚喺度望風景睇燈飾~

食食吓飯, 囝已經攰到瞓著咗, 抱佢落樓下, 發現纜車站超多人等車落山.... 起碼要排成粒鐘! 又夜又凍, 我哋即刻轉去等小巴落山~

今次上山頂比我哋感覺最深就係"好很多人" .....其實山頂幾時開始變成咁ga 呢?

我在fb搵番啲舊相, 原來我對上一次上山頂已經係2009年既事, 當時纜車站同埋凌霄閣都唔算多人, 不知幾鬆動!! 自從大量遊客湧入, 好多旅遊景點已經唔再係俾hk人去玩去體驗喇! 根本塞到hk人怕怕唔敢再嚟.....吸引力大減呀!~ 

9年前的我! 同依加個髮型咁啱係一樣....^^" 不過當年我並唔係同鄧生上嚟, 當時都未認識佢~ 所以沉日都係我同鄧生第1次一起上山頂呀~  

沉日我哋就係迫在哩個位置等上車, 當年係無人ga.....

寶品5歲生日

寶品2月份生日, 通常新舊曆生日都好接近~ 

今年5歲仔, 新曆生日咁啱撞啱新年跟公公婆婆返咗大陸探親, 所以正日婆婆在內地為佢慶祝~ 寶品有好多親戚陪佢切蛋糕(5圍枱咁多人), 佢好開心呀~ 仲收到好多生日利是~ 發達!

婆婆話哩個thomas蛋糕聲稱3磅 (睇落唔似), 要成5舊水人仔.....真係搶錢, 仲要咁簡單, 又唔算靚! 不過係阿囝自己揀既, 佢C都唔肯揀其他, 仍然係Thomas 鐵粉.....

感受到自己做主角, 又收到咁多祝賀, 寶品真係好開心呀~ 其實佢期待咗生日好耐~ 依加大個仔, 識得睇月曆計日子, 經常都會倒數住自己的生日~ 

生日當天, 佢朝早瞓醒第1時間彈上婆婆張床度, 跳吓跳吓叫婆婆同佢講生日快樂(學peppa), 同埋去買生日蛋糕~ 佢真係等咗哩日好耐~

雖然我唔在場, 但睇相都知道阿囝有幾幸福~

其實1歲幫仔攪過生日會(book會所party room, 請好多朋友果種) 之後, 都無再攪過生日會了~ 主要係因為朋友們都好客氣, 又利是又禮物咁, 實在唔想佢哋每年都要破費1次~ 同埋寶品已經超多玩具, 如果每年生日再添更多玩具的話, 一來玩唔哂, 二來又怕小朋友唔識珍惜, 覺得生日老鳯會收好多禮物..... 所以近幾年都係同公公婆婆一家人切吓蛋糕叫吓到會在家一齊慶吓生日就算~

今年正日我不在寶品身邊, 所以舊曆生日我就幫佢慶祝吓~ 知道阿囝開始懂事, 對生日會開始有幻想~ 所以我今年隆重少少, 整d佈置tum佢開心~ 其實都係淘寶貨, 不過以往係無乜攪佈置的, 所以今年算係好大陣象ga喇~ 

主題首選當然係寶品好鐘意的thomas la~ haha~

阿囝一入屋見到啲佈置, 真係開心到彈起, 即刻大聲同我講"多謝呀!"~ 

當時真係覺得此刻無價~ 再麻煩我都願意為你準備! 只要你開心, 媽咪就會一樣開心~ 我諗佢都感受到大家都好重視佢, 想佢有個快樂生日~

食物係貪方便叫到會~ 我真係無乜能力自己整野食~ 第2次幫襯哩間到會, 啲野都幾好食~

幸福小皇子~ 生日快樂呀!

當然唔少得寶品最愛的2位表哥~ 同埋成日一齊補習的朋友仔~

屋企明明買咗好多靚靚candles, 偏偏當日唔記得帶去婆婆度.....唯有留番出年用la~

我啲屋企人, 全部都係超細食....已經唔係第1年食淨生日蛋糕....連續2年, 蛋糕食唔到4份之1.... (好貴吓ga >.<) , 佢哋話見到啲色素蛋糕就唔係太想食, 而且已經食野食到飽哂~

出年我真係考慮買個平啲的蛋糕算喇, 反正都無人食既>.<~ 最後又係留番俾工人姐姐做早餐....

當晚一共5男仔+1女仔, 妹妹完全埋唔到堆~ 哈哈~ 乜都未識, 就唯有坐低睇其他人玩~ 

5個男仔, 齋係玩氣球已經好癲~

後來我哋轉玩啲靜啲的遊戲~ 大富翁~

表哥佢哋第1次玩大富翁, 覺得好好玩呀~ 即刻要佢哋爸媽第2日買一盒返屋企~

寶品當晚好旺, 做咗winner~ 睇住佢哋玩都覺得笑料百出~ 好開心~

因為鄧生近月都要忙工事, 所以生日會都出席唔到~ 所以第2日, 鄧生又買咗個蛋糕比囝~ 我哋一齊去yoho mall攪蛋糕, 寶品話最鐘意哩個B duck游水蛋糕~ 黑森木口味, 幾好食喎~ 而且價錢都唔算貴呀~ 

今次特登插5支candles, 對小朋友嚟講, 哩part好有意義ga~ 佢哋覺得幾歲就要插幾多支~

寶貝仔, 生日快樂呀! 謝謝你來當我的寶貝!

寶品係一個開心仔, 好容易開心~ 而唔開心的事又好快忘記, 唔會嬲人~ 諗野同埋講說話有時仲係好天真~ 其實我好鐘意佢哩一面~ 好易tum~ 雖然有時佢會過份hyper, 鬧極唔聽~ 不過我仍然相信哩啲缺點係仲有機會改善的~ 而且凡人都係會有優點有缺點, 就算有缺點, 都無減媽咪心裡面對你既愛ga~ 但作為父母的, 見你做錯一定要指導你, 鬧吓都在所難免~ 鬼叫我好聲好氣提醒你, 你當我唱歌咩! 有時真係好勞氣~ 希望你大一歲仔, 會聽話啲~ 繼續開開心心, 保留住純真的一面~

天水圍綠田園

今年小朋友的農曆新年假期好悠長~ 而因為早前阿囝病咗, 好多學術班都請咗假, 就趁長假期補番哂啲堂~ 年初八當天, 我就請假帶仔去上堂, 當日行程非常緊密, 最後我哋係上咗英文班 + 朋友嚟屋企短聚+綠田園+再去上英文班, 然後晚上仲去婆婆屋企開埋生日會! 我又出去拎蛋糕又佈置, 攪到咁多野, 真係覺得自己係鐵人! haha 咁啱果日鄧生返工忙到要OT夜返, 全日係無出現過, 連生日會都嚟唔到 >.<........

同學嚟我哋屋企玩一陣~ 寶品最鐘意拎哩套變色雪糕嚟招呼朋友ga~ 因為佢鐘意玩冰.....^^"

我哋由天水圍西鐵站坐的士去綠田園~ 好快就到~ 

入場係唔收費的, 但裡面每樣玩樂設施逐樣收錢~

閒日係非常少人~ 平時無乜機會坐哩啲船仔, 嚟到梗係要試吓~ 仲可以買包魚糧嚟餵魚, 小朋友最鐘意!~ 

之後玩其他設施, 無乜人玩又唔駛等~ 好彩有同學仔一齊去, 不然無伴寶品就無耐性玩ga喇~ 佢依加乜都鐘意有朋友陪玩~

阿囝踩車無耐, 運動比較屎, 所以有時唔夠力都要我幫吓佢~

喳船仔~ 要自己用手攪, 攪到手都軟~ ^^" 

阿囝最鐘意玩沙~ 但就係因為坐定定玩咗一陣沙, 就被蚊針到耳仔同埋額頭....... 冬天都有蚊, 夏天咪大鑊? 

最後重頭節目係滑草~ 揀嚟綠田園主要原因係知道佢新整咗個滑草區~

寶品在澳門滑過2次草, 係超開心~ 所以我就諗住帶佢嚟滑吓~

但哩度唔俾家長一齊坐一齊滑, 所以細膽仔就唔肯玩喇! 就算朋友示範滑咗2次, 佢都唔肯跟住一齊玩....所以就白白浪費咗我$30 (玩6分鐘)~ 不過都唔怪得佢既, 我自己都係勁細膽之人~ 而阿囝係玩過幾次刺激野之後被嚇親咗, 以後唔敢再試任何高的、快的玩意......唔知大d會唔會好啲呢?

玩完, 食少少野就call的士落返元朗喇~ around $60~ 咁樣計落都係喳車去抵d, 因為有free parking~ 可惜daddy今日唔得閒, 請唔到假~