母親節2018

最近非常忙碌, 好似由復活節假期開始, 到依加都無乜停過, 應付工作+玩樂+阿囝密集式學野補堂, 前排仲開始報小學, 整portfolio.... 真係唔記得自己有幾耐無好好休息過! 

上星期我媽咪要做一個大手術, 今個母親節無得同媽咪食飯, 希望佢快啲好番哂, 健健康康~

 每日都有去醫院探媽咪, 寶品叫我母親節記住送花比自己媽媽, 所以我買咗盆靚花去醫院~

媽咪收到都好開心~ 今次由我阿妹負責煲粥燉湯比媽咪食, 真心覺得有囡真好, 咁老來有病痛都有阿囡照顧吓! 我啲廚藝麻麻, 無煮野去, 唯有幫媽咪抹吓面, 洗吓水果咁啦~ ^^"

寶品想母親節送花俾媽咪, 但鄧生話佢要做家務嚟換錢買花, 之後叫佢做乜, 寶品都話唔識做! 非常唔願做家務.......算啦~ 其實唔收花我都ok~ 實際d, 屈鄧生俾錢買對美少女戰士波鞋比我當係禮物~ 鄧生話覺得個款唔啱我哩個年紀著.... 哼! 童年回憶嘛! 我覺得不知幾靚~ ^^ 

買鞋仲包1件tee~

母親節都係東奔西走咁去學野~ 中午放break, 有2個鐘可以食lunch同埋逛吓~

上完堂我就去醫院探病, 囝就回家補眠, 起身食個晚飯又去學游水喇~ 

會所有花派, 免費~ 寶品可以唔駛錢送花俾媽咪喇~ haha

送花時, 佢話: 媽咪母親節快樂, 我最鐘意你~

真係好冧! 可惜轉頭學游水佢又作反唔認真, 又被我丙....>.<

去一田買咗啲蛋糕, 忙咗成日, 大家一齊食啲甜野開心吓~

但我發覺我哋全家都真係麻麻哋鐘意食蛋糕, 每次買都食剩勁多.....

希望明年母親節, 我哋可以輕輕鬆鬆咁過, 唔再咁忙碌~