剛過去的星期天, 真係由朝忙到晚, 因為咁啱撞咗英文communication skill exam 同埋朗誦比賽, 好彩朗誦比賽肯俾我哋改時間~ 今次有partner一齊玩對誦, 如果未能出席, 就浪費咗大家的報名費(每人$370), 咁我會非常唔好意思ga~ 好彩最後都可以照比賽, 排咗我哋去最尾果場~
朝早例牌先去奧運上面試班先~ 每次上完我哋都會帶仔去唔同地方食lunch~ 去啲平時少去的餐廳, 俾多啲新鮮感佢, 佢又食得開心d~ 多數在奧運or 佐敦尖咀一帶搵食~ 試過太平館, cheese cake factory, sense cafe, 和民等等.... 今次揀咗食湘菜, 貪佢唔駛等位~ 點知全部野都好濃味, 隻鴨仲好辣....唔太啱我哋口味... 難怪無人等位!
不過寶品話哩個冬菇包好好味, 食咗3隻! @.@
食完lunch就去上環英文考試~ 媽媽我諗住communication skill exam 係trinity的exam之一, 又覺得阿囝啲英文都講到2咀, 就幫佢報哩個考試~ 講真報名前我係唔太了解哩個exam係咩玩法, 原來係要背2段野, 到時去到show and tell, 之後考官再問你幾條問題~
平時hea學, 臨近exam苦練咗1-2星期後, 阿囝係應付到的~ 但過程唔係太愉快囉~ 始終要小朋友背咁大段野, 係會有啲吃力! 唔想囝因為咁樣而唔鐘意學英文, 所以決定唔會再報更高level, 試咗就算喇~ 暫時未出result~
之後就去outback食個tea 等夠鐘去朗誦比賽~
今次阿囝同佢女神一齊對誦, 我哋都有啲緊張, 擔心佢表現唔好, 連帶partner都無獎~ 所以我哋今次提早咗準備, 晚上一有空就陪佢練習, 因為我哋相信, 成功係留俾有準備既人~
結果2位小朋友做得非常好, 比平時練習時讀得更好更整齊! 見到佢哋咁叻, 我真係感動到啲眼淚湧出嚟! 可能會嚇親partner的媽咪~ 但唔知點解, 果一刻真係突然好感性.....鄧生就見慣哂, 因為我係好眼淺的人~ 陪住阿囝1次又1次參加朗誦比賽, 見住佢進步, 到今日咁淡定做齊哂要做既野, 真心覺得好欣慰~
結果真係拎咗冠軍! 全部人包括2位小朋友、大家的爸媽都非常開心!
阿囝第1次拎冠軍, 睇相都知佢幾咁開心~ 雖然唔係咩大比賽, 但對小朋友嚟講, 真係好大鼓勵ga~
之後2位小朋友話想在附近公園玩, 父母都有求必應, 俾佢哋玩半小時~
忙碌的一天仲未完結, 食少少野, 仲要去學埋游水先~ 本來鄧生叫我停一堂, 但眼見阿囝學水進度好慢, 而且下星期要去日本旅行要停課, 最後我都係決定照游!
忙完哂所有事情, 9點幾回家前, 獎阿囝買1樣野, 佢揀咗買雪糕~ 當然無問題la~
你今日實在做得太好~ 凡事盡力, 係daddy mummy最想見到的!
而鄧生獎俾囝的禮物, 就係全新的ipad~ 連埋筆、套、apple care, 花咗6千幾蚊, 我覺得好貴! 貴野留俾daddy 送~
