好耐無更新個blog喇~ 原因係在家裡無時間用電腦, 我又不喜歡用手機寫blog, 再加上工作上有所轉變, 令我忙得連些少上網的時間都無.....偶然有空閒時間都要覆咗d whats app message先~
講吓近況, 寶品哥現在已經2歲10個月, 返咗PN班4個月, 將近完成上學期了~
對於應唔應該返PN班, 其實好睇各人的家庭狀況~ 好似我哋係在職父母, 100%交比工人姐姐湊的家庭, 其實返學有好多好處~ 可以學習同其他人相處, 聽老師指令, 同埋每日有幾個鐘接觸吓外面既世界, 個人都會開朗D, 無咁封閉啦~ 因為我很不放心交俾姐姐帶囝出街放電或去公園, 所以如果唔返PN每日就會留在家對住姐姐同埋四道牆, 感覺好似坐監咁....而且2歲幾正值海綿期, 係佢哋最吸收同埋最有探索能力的階段, 還是交比專業的老師教導佢哋, 總比工人姐姐教好得多吧?
不過寶品哥起初似乎不太喜歡返學~ 每日入校門都喊, 起初會體諒佢未適應新環境, 後來發覺工人姐姐帶返學就唔喊, 媽咪(我)/ 婆婆帶就大喊..... 而且老師話佢返到課室就無喊, 好明顯只係喊比我哋睇, 想扭計..... 值至最近, 上學足足4個月後, 佢終於無喊, 仲向婆婆揮手say goodbye!! 終於接受咗!~
返學喊的問題漸見好轉, 另一問題就係功課~ 因為寶品就讀私立幼稚園, 明顯係重學術的, 所以就算係PN班, 都會每一有功課, 不過只會係填色和簡單連線~ 但係寶品對填色毫無興趣, 毫無耐性, 好抗拒坐定定填色! 每次都攪東攪西攪顏色筆, 講其他野叉開話題..... 我明白佢仲細, 未必可以好有耐性填色, 而且唔應該要求佢做得靚~ 我對功課無要求, 但有時佢啲態度真係令我好火滾!! 好彩仲細, 仲有時間慢慢教~
自從返咗學後, 發覺佢表達能力進步咗少少, 講多咗野~ 而且對學校學過的東西都會有印象, 又學識唱好多兒歌~ 有空我會陪佢溫習學校學過的生字, 發覺佢認字唔差, 算係有記性, 而且英語能力常常被老師讚好~ 咁我已經好滿足喇~ 感覺這一切都係值得, 就算慳d洗$, 我哋都想比好啲既教育佢~
星期1-5都要返學, 暫時假日都唔想學野住~ 開學後我哋每逢星期六日都會陪囝玩~ 搵節目去街~ 去體驗~ 去野餐~ 比佢好好relex吓~ 玩到連婆婆都鬧我, 話我每逢假日咁玩法, 攪到個囝又攰又唔夠休息..... 其實我覺得阿囝有得去街好開心喎~ 依加有得玩仲唔玩多d?
寶品哥最鐘意鐵路~ 愛西鐵、火車、輕鐵~ 熱愛程度係非常之誇張....坐幾多次都仍然咁興奮! 其實我有諗過, 不如做功課乖就帶佢去坐西鐵, 可能咁可以鼓勵到佢乖d, 之但係每次教佢做功課時已經係晚飯後, 又唔想換衫帶佢出去咁麻煩....
最近帶寶品哥去影咗攝古裝相~ 影既時候佢扮賣菜仔~ 佢主動拎面前的假水果食物, 扮食....食得津津有味咁既樣, 交足戲, 仲造埋聲配埋音, 唔講真係以為佢食緊真野!! 笑到我哋肚都痛!! haha
我發現佢好識扮野, 幾有做戲天份, 遲吓想比佢試吓上Drama堂~ 一來不用坐定定書寫, 二來可以過戲癮, 增強自信心~ 應該幾啱佢~ 哈哈~
